Risg i fanylion plant bregus wedi tor diogelwch data

Mae manylion plant bregus yng Nghaerdydd wedi cael eu peryglu oherwydd tor diogelwch data, yn ôl dogfennau'r cyngor.

Mae'r methiant seiberddiogelwch yn golygu "risg diogelu posib i blant" ac yn ymwneud â phobl ifanc y mae cyngor Caerdydd yn gofalu amdanyn nhw, yn ôl Gwasanaeth Adrodd ar Ddemocratiaeth Leol.

Cafodd aelodau o bwyllgor llywodraethu ac archwilio cyngor Caerdydd wybod am y tor diogelwch data gan un o swyddogion y cyngor mewn cyfarfod ddydd Mawrth.

Mae cyngor Caerdydd a Data Cymru wedi cael cais am ymateb.

Roedd dogfen y cyngor yn nodi fod "methiant mewn seiberddiogelwch yn arwain at dor-data ac felly'n risg bosibl o ran diogelu plant" a nodwyd hefyd fod y sefyllfa wedi gwaethygu ym mis Ionawr eleni.

Fe wnaeth cyfarwyddwr gwasanaethau plant y cyngor, Deborah Driffield, sôn am y tor diogelwch data wrth gyflwyno diweddariad ar reoli risg i aelodau pwyllgor.

Dywedodd: [Mae yna] rai problemau ynghylch seiberddiogelwch.

"Rydym wedi cael toriad data yr ydym yn ei reoli ar hyn o bryd ac yn llunio trefniadau newydd ar gyfer byd lle mae pobl yn dwyn data a'i rannu ar y we dywyll ac ry'n yn ceisio deall sut y gallwn atal hynny."

'Hwn yn faes newydd'

"Mae hwn yn faes eithaf newydd i ni, ond rydym wedi rhannu'r risg ac yn gweithio gyda Llywodraeth Cymru a Data Cymru a'r holl awdurdodau lleol ar hynny."

Fe wnaeth datganiad y cyngor hefyd nodi fod gwaith wedi cychwyn gyda thîm seiberddiogelwch arbenigol, bod asesiadau risg yn cael eu cymryd, a chynllun yn cael ei ddatblygu.

Fe wnaeth y methiant effeithio ar Data Cymru, cwmni llywodraeth leol yng Nghymru sy'n cefnogi cynghorau a'u partneriaid i gasglu data.

Mae bwrdd cyfarwyddwyr y cwmni wedi'i ethol gan Gymdeithas Llywodraeth Leol Cymru.