Pryder am bobl anabl yn sgil cau pwll nofio Pontardawe

Dywedodd Betsan ei bod yn "teimlo bod teulu fi yn cael ein gwahaniaethu"

Bydd cau pwll nofio Pontardawe yn niweidiol i iechyd a lles pobl ag anableddau, yn ôl mam sy'n defnyddio'r ganolfan bob wythnos gyda'i dwy ferch anabl.

Mae Cyngor Castell-nedd Port Talbot wedi cadarnhau y bydd y pwll yn cau ym mis Awst am resymau diogelwch.

Maen nhw'n dweud eu bod yn edrych y posibilrwydd o gael pwll nofio newydd i'r ardal.

Mae merched Betsan Gower Gallagher - Brielle a Bowan - wrth eu bodd yn defnyddio’r pwll nofio ym Mhontardawe.

Mae'r efeilliaid yn awtistig ac mae ganddyn nhw anghenion penodol.

Mae Brielle a Bowan wrth eu bodd yn defnyddio’r pwll nofio ym Mhontardawe

Yn ôl Betsan, mae defnyddio'r pwll sydd wedi'i gynhesu yn helpu gyda'u hiechyd corfforol a meddyliol.

"Fan hyn fi'n gallu dod â nhw, maen nhw'n joio, mae pawb yn hollol gynhwysol a hollol gyfeillgar at fy mhlant i.

"Dwi jest yn joio dod â nhw. Mae popeth i blant ac oedolion anabl yma."

'Gwahaniaethu'

Yng Nghastell-nedd mae’r pwll nofio agosaf at y teulu, ond does gan y pwll ddim yr un cyfleusterau sy’n ei wneud yn addas i’r efeilliaid.

"Mae'n mynd i fod yn lot fwy prysur 'na. Bydd y plant yn fwy tebygol o gael meltdowns, mwy costus," meddai Betsan.

"So fi'n teimlo bod teulu fi yn cael ein gwahaniaethu."

Bydd pwll nofio Pontardawe yn cau ym mis Awst am resymau diogelwch

Cafodd y pwll ei gau yn gyntaf yn 2012, ar ôl i’r cyngor ddarganfod diffygion yn ymwneud â’r concrit a’r strwythur.

Fe agorodd eto ym mis Ionawr y llynedd, ond erbyn hyn mae’r cyngor yn dweud bod yr adeilad yn rhy beryglus.

Mae’r cyngor hefyd wedi ymrwymo £30,000 ar gyfer astudiaeth a fydd yn edrych ar y posibilrwydd o ddarparu pwll newydd i’r ardal.

Ond fe allai hynny gostio rhwng £10m a £12m.

Mae'r Cynghorydd Nia Jenkins yn obeithiol y bydd modd cael pwll nofio newydd i'r ardal

Dywedodd Nia Jenkins, sy'n gynghorydd dros ardal Alltwen ar Gyngor Castell-nedd Port Talbot: "Y broblem ar hyn o bryd yw cael yr arian i 'neud 'na.

"A gydag unrhyw bwll newydd bydd yn rhaid i ni gael arian wrth y Senedd neu San Steffan i fynd tuag at yr adeiladu.

"Ond maen nhw'n tueddu i ddweud y dylai pwll nofio fod o fewn rhyw 20 munud o'ch tŷ, a mae Castell-nedd jest rhy bell - dim ond jest dros yr 20 munud.

"So ni yn deall bod isie pwll nofio yma, a gyda'r faeasability study ni yn gobeithio bydd rhywbeth yn dod."