Rhybudd am wyntoedd cryfion ar draws Cymru nos Sul a dydd Llun

Mae'r rhybudd melyn mewn grym ar gyfer Cymru gyfan o 20:00 nos Sul tan 18:00 nos Lun

Mae'r Swyddfa Dywydd wedi dweud y gallai gwyntoedd cryfion achosi difrod a phroblemau teithio ar draws Cymru nos Sul a dydd Llun.

Daw'r rhybudd i rym am 20:00 nos Sul, gan barhau tan 18:00 nos Lun.

Mae disgwyl i wyntoedd cryfion o'r gorllewin daro'r arfordir nos Sul cyn ymledu i fewndiroedd.

Gall cyflymder y gwyntoedd ger y môr ac ar y bryniau gyrraedd 70mya ar adegau, ac mae disgwyl hyrddiadau hyd at 55mya mewn mannau eraill, cyn gostegu yn hwyrach brynhawn Llun.

Mae'r Swyddfa Dywydd yn rhybuddio gallai'r tywydd gwyntog achosi problemau teithio.

Mae'n bosib y bydd rhywfaint o ddifrod i adeiladau megis llechi a theils yn dod yn rhydd, a thoriadau i gyflenwadau trydan.

Mae rhybudd hefyd y gallai tonnau mawr effeithio ar gymunedau arfordirol.

Cafodd y gwasanaeth tân ac achub eu galw i lifogydd yng Nghwmbwrla brynhawn Sul

Mae Gwasanaeth Tân ac Achub De Cymru wedi dweud eu bod nhw'n brysur iawn gydag adroddiadau am lifogydd yn ardal Abertawe.

Dywedon nhw eu bod wedi cael eu galw i ddigwyddiadau yng Nghilâ, Cwmbwrla a Threfansel.

Mae tri rhybudd i ddisgwyl llifogydd mewn grym ar hyn o bryd ym Mhwll, Llanelli a'r Gŵyr.

Hefyd, mae rhybudd am lifogydd posib mewn pump lleoliad, yn afonydd Gwendraeth, afonydd Nant-Y-Fendrod a Nant Bran, afonydd yn Llanelli, Penrhyn Gŵyr ac yr afonydd Taf a Chynin.