Twnnel Conwy yn ailagor yn llawn ar ôl tân ar yr A55

Mae'r twnnel wedi ailagor yn llawn ar ôl iddo gau oherwydd tân dydd Iau

Mae twnnel Conwy wedi ailagor yn llawn ar ôl iddo gau oherwydd tân brynhawn Iau.

Cafodd y twnnel i gyfeiriad y gorllewin ei gau ar ôl i gerbyd fynd ar dân, gyda thraffig yn cael ei symud drwy'r twnnel tua'r dwyrain.

Fe agorodd y twnnel yn rhannol wedi i'r cerbyd gael ei symud yn yr oriau mân ddydd Gwener, ond roedd tagfeydd mawr ar yr A55 ers y digwyddiad.

Cadarnhaodd Gwasanaeth Tân ac Achub Gogledd Cymru nad oedd unrhyw un wedi marw, ond cafodd digwyddiad mawr ei ddatgan.

Bydd terfyn cyflymder dros dro o 50mya o gwmpas y twnnel, a bydd y twnnel tua'r gorllewin yn cau dros nos yr wythnos nesaf ar gyfer atgyweiriadau, yn ôl Traffig Cymru.

Fe gafodd y Gwasanaeth Tân ac Achub wybod am y tân am 13:49 ddydd Iau ac fe adawodd y criwiau'r lleoliad am 19:52.

Yn ôl llefarydd ar ran y gwasanaeth fe gafodd 10 injan dân eu galw i'r digwyddiad.

Ar gyfartaledd mae tua 40,000 o gerbydau yn gyrru trwy'r twnnel bob dydd.

Dywedodd Ysgrifennydd y Cabinet dros Drafnidiaeth, Ken Skates fod "gwaith anhygoel wedi digwydd i gael y twnnel yn ôl yn agor mor sydyn".

Dywedodd Ysgrifennydd y Cabinet dros Drafnidiaeth, Ken Skates fod "gwaith anhygoel wedi digwydd i gael y twnnel i agor mor sydyn".

"Mae be fuasai wedi gallu bod yn ddigwyddiad erchyll wedi ei osgoi oherwydd y cynlluniau a'r gwaith paratoi am y fath yma o ddigwyddiad," meddai.

"Mae'r timau ar draws y gwasanaethau brys, asiantaeth cefnffyrdd, a Llywodraeth Cymru wedi gwneud gwaith arbennig i sicrhau bod neb wedi brifo neu waeth, ac mae'r ymdrech sydd wedi mynd i mewn i'w ailagor mor sydyn mewn dim ond tri diwrnod yn anhygoel."

Ychwanegodd bod cydrannau trydanol yn y twnnel wedi cael eu newid a bod gwaith i sicrhau bod y twnnel yn ddiogel yn strwythurol hefyd wedi digwydd.

"Wnes i yrru drwy'r twnnel yn gynharach heddiw a fuasech chi erioed yn meddwl fod tân mawr wedi digwydd yna," meddai.

Roedd lluniau ar gyfryngau cymdeithasol yn dangos craen ar dân yn y twnnel

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.