Beirniadu Zip World am godi tâl parcio ac arwydd uniaith Saesneg

Mae Zip World wedi'i feirniadu am godi am barcio ar ei safle yn Chwarel Penrhyn

Mae cwmni Zip World wedi'i feirniadu am godi tâl am barcio ar un o'i safleoedd yng Ngwynedd.

Mae arwyddion a gafodd eu gosod ym maes parcio Chwarel Penrhyn, Bethesda, yn nodi bod angen talu £3 am hyd at dair awr o barcio.

Mae'r cwmni yn cael ei feirniadu hefyd am osod arwyddion Saesneg yn unig.

Mae Zip World wedi ymddiheuro am y diffyg Cymraeg ar yr arwyddion ac yn dweud y bydd arwyddion Cymraeg yn cael eu gosod yr wythnos nesaf.

Ychwanegodd llefarydd fod y cwmni'n codi am barcio i "helpu gyda’r cynnydd mewn costau busnes".

'Rhag cywilydd'

Mae nifer o bobl leol yn flin bod rhaid talu am barcio - yn enwedig pobl sy'n mynd i'r caffi ar y safle.

Dywedodd Gaynor Davies: "Wel dyna ni fyddan ni ddim yn mynd am ginio neu coffi a talu £3 i barcio, na gyrru neb arall yna chwaith."

Dywedodd Barbara Hardy: "Rhag cywilydd iddyn nhw godi £3 i barcio. Mae pobl lleol yn mynd i'r Zip am ginio a coffi reit aml. Ni fydd pobl leol yn cefnogi hyn."

Dywedodd Ann Griffiths: "Ni fydd pobl leol yn mynd yna am goffi rwan - fydd o'n rhy gostus - pobl leol sy'n mynd yna'n y gaeaf pan mae'r twristiaid i ffwrdd."

'Siomedig'

Dywedodd y cynghorydd lleol Beca Roberts :"Gwynedd sy'n arwain y ffordd o ran proffil, polisi a'r defnydd o'r Gymraeg ledled Cymru.

"Mae sicrhau'r balans rhwng gwasanaethu cymunedau'r ardal a gwasanaethu'r diwydiant twristaidd yn her fawr - yn arbennig adeg yma o'r flwyddyn pan fo mwy o brysurdeb yn y fro.

"Siomedig ydy gweld arwyddion uniaith Saesneg gan gyflogwr mawr sy'n gwasanaethu pobl leol - mae canran uchel sy'n siaradwyr Cymraeg, yma yn Nyffryn Ogwen.

"Dwi'n hyderus y gall y gwall hwn gael ei unioni gan y cwmni, a byddaf yn cysylltu â Zip World i holi iddynt ailedrych ar eu polisi ieithyddol."

'Cynnydd mewn costau busnes'

Dywedodd llefarydd ar ran Zip World: “Yn yr un modd â nifer o fusnesau eraill, rydyn ni wedi dechrau codi am barcio yn Zip World i helpu gyda’r cynnydd mewn costau busnes.

"Dim ond un cynllun yw hwn a fydd yn golygu ein bod yn gallu dal ati i wella ac ailfuddsoddi yn ein safleoedd, gan gynnwys cynnal a chadw ac, yn bwysicaf oll, gwella’r profiad i’n holl ymwelwyr.

"Rydyn ni dal wedi ymrwymo i gefnogi ein cymunedau lleol a byddwn ni’n parhau i fuddsoddi yn yr ardaloedd sydd o amgylch ein safleoedd.”