Dyn wedi ei anafu'n ddifrifol ar ôl digwyddiad ym Môn
Fe gafodd y gwasanaethau brys eu galw i stryd Rhosdir, Y Gaerwen fore Iau
- Cyhoeddwyd
Mae dyn wedi cael anafiadau difrifol yn dilyn digwyddiad tu allan i dŷ yn Y Gaerwen ar Ynys Môn.
Mae'r dyn, sydd yn ei 20au, wedi cael ei gludo mewn ambiwlans awyr i ysbyty yn Stoke yn dilyn yr hyn sy'n cael ei ddisgrifio fel "digwyddiad yn ymwneud â cherbyd tu allan i eiddo preswyl".
Fe gafodd y gwasanaethau brys eu galw i stryd Rhosdir, Y Gaerwen fore Iau, ac fe gafodd ambiwlansys awyr eu hanfon am 09:10 o Gaernarfon a'r Trallwng.
Dywed Heddlu'r Gogledd iddyn nhw wedyn dderbyn galwad gan y gwasanaeth ambiwlans am 09:11.
Mae'r Gwasanaeth Ambiwlans Awyr yn dweud bod eu criwiau nhw wedi gadael cyn 11:00.