Rhan o'r A470 ar gau wedi damwain trên ger Llanbrynmair

Cafodd y gwasanaethau brys eu galw toc wedi 19:00 nos Lun

Mae Heddlu Trafnidiaeth wedi cadarnhau fod dau drên cyflymder isel wedi taro yn erbyn ei gilydd ger Llanbrynmair.

Cadarnhaodd Network Rail a Trafnidiaeth Cymru bod y gwasanaethau brys yn ymateb i ddigwyddiad rhwng y trên 18:31 o Amwythig i Aberystwyth a thrên 19:09 o Fachynlleth i Amwythig nos Lun.

"Mae'r rheilffordd ar gau wrth i'r gwaith fynd rhagddo," meddai datganiad ar y cyd.

"Ein prif flaenoriaeth yw diogelwch teithwyr ac ry'n yn gwneud popeth o fewn ein gallu i gefnogi y gwasanaethau brys wrth iddyn nhw ymateb i'r digwyddiad."

Mae Heddlu-Dyfed Powys wedi cau ffordd yr A470 yn ardal Talerddig ac yn cynghori gyrwyr i osgoi'r ardal.

Yn ôl trigolion lleol mae ambiwlansys ac ambiwlans awyr wedi cyrraedd y safle ac yn ôl adroddiadau fe gyrhaeddodd hofrennydd gwylwyr y glannau Rescue 936 y lleoliad yn hwyr nos Lun.

Mae Gwasanaeth Tân ac Achub Canolbarth a Gorllewin Cymru wedi cadarnhau bod diffoddwyr tân yn ymateb i’r digwyddiad.

Dywedon nhw eu bod wedi'u galw wedi iddyn nhw gael eu hysbysu am ddamwain trên am 19:34 ond maen nhw wedi gwrthod gwneud sylw pellach.

Dywed Trafnidiaeth Cymru y bydd y gwasanaethau rhwng Amwythig ac Aberystwyth yn cael eu canslo am y tro ond byddan nhw'n darparu dull arall o deithio rhwng y ddau le.

Oherwydd bod ffyrdd ar gau, ni fydd y gwasanaeth yn galw yng ngorsaf Caersws am y tro.