Awyrennau ymladd Americanaidd yn ymarfer yng ngorllewin Cymru

Yr awyrennau ymladd - F35-A - oedd yn rhan o'r ymarferion

Cafodd cymunedau yn y de-orllewin eu syfrdanu nos Lun wrth i lu awyr yr Unol Daleithiau gynnal ymarferion yn yr ardal.

Roedd sawl awyren F35-A yn rhan o'r ymarferion uwchben Sir Benfro a Sir Gaerfyrddin - oedd yn cynnwys hedfan yn gyflym ar uchder isel.

Roedd cannoedd o sylwadau yn trafod y mater ar y cyfryngau cymdeithasol, gyda rhai yn dweud nad oedden nhw erioed wedi gweld ymarferion mor swnllyd fin nos o'r blaen.

Fe wnaeth un o swyddogion canolfan llu awyr yr UDA yn Suffolk gadarnhau bod eu hawyrennau yn rhan o'r ymarferion.

Ychwanegodd fod "angen i beilotiaid feistroli nifer o sgiliau penodol, ac mae hedfan gyda'r nos yn un o'r sgiliau hynny".

'Reit gyffrous'

Dywedodd Nigel Williams o Cross Hands ei fod yn gwylio'r teledu gyda'i deulu pan glywodd y sŵn.

"Fe aethon ni allan a dechrau ffilmio'r cyfan. Ni 'rioed wedi clywed unrhyw beth fel hynny o'r blaen, roedd y cyfan yn reit gyffrous i ddweud y gwir," meddai.

"Roedd yn ymddangos i ni fel bod yr awyrennau yn dilyn gwrthrych arall oedd â golau coch arno.

"Fe ddiflannodd y golau, a ry' ni'n meddwl bod yr awyrennau wedi dilyn y gwrthrych tua'r gorllewin," meddai.

Mae gan Weinyddiaeth Amddiffyn y DU nifer o safleoedd sy'n cael eu defnyddio ar gyfer ymarferion, gan gynnwys ardal sy'n cael ei gyfeirio ato fel y 'Mach Loop' yn ardal Machynlleth.