Rhybudd busnes Caernarfon wedi twyll gostiodd 'hyd at £1,000'

Becws Melys

Roedd cyfanswm o 31 o'r 50 archeb yn rhai ffug, yn ôl perchnogion Melys

Mae bwyty yng Nghaernarfon wedi rhybuddio busnesau eraill yn y dref yn dilyn digwyddiad ar noson arbennig i'r bwyty yr wythnos ddiwethaf.

Roedd bwyty Melys ar y Cei Llechi yn cynnal noson arbennig i lansio bwydlen Eidalaidd newydd sbon.

Gan eu bod wedi derbyn 50 o archebion am fwrdd ar y noson, penderfynwyd peidio derbyn mwy gan fod hynny'n llenwi'r lle.

Cafodd dros 40 o geisiadau eraill am fwrdd eu gwrthod.

Ond sylweddolodd y perchnogion fod rhywbeth o'i le wrth i'r noson fynd yn ei blaen.

Nid yw’r post yma ar Facebook yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar Facebook
Dyw'r BBC ddim yn gyfrifol am gynnwys gwefannau allanol. Gallai hysbysebion ymddangos yng nghynnwys Facebook.
I osgoi neges facebook gan Melys Cheesecakes

Caniatáu cynnwys Facebook?

Mae’r erthygl yma’n cynnwys elfennau sydd wedi eu darparu gan Facebook. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis Facebook Meta a pholisi preifatrwydd cyn derbyn. Er mwyn gweld y cynnwys dewiswch ‘derbyn a pharhau’.

Dyw'r BBC ddim yn gyfrifol am gynnwys gwefannau allanol. Gallai hysbysebion ymddangos yng nghynnwys Facebook.

Mewn neges ar dudalen Facebook y bwyty, dywedodd y perchnogion: "Daeth yn amlwg mai archebion ffug oedd nifer o'r archebion a archebwyd drwy ein system ar-lein.

"Roedd rhywun wedi cadw byrddau i 4,5,6 a 7 o bobl mewn gwahanol enwau, o dan wahanol gyfeiriadau e-bost ffug ac ar wahanol amseroedd drwy gydol y nos.

"Roedd cyfanswm o 31 o'r 50 archeb yn rhai ffug."

Aeth y neges ymlaen i ddweud fod y busnes wedi bod yng Nghei Llechi ers dros ddwy flynedd, ac nad oedden nhw'n ymwybodol eu bod wedi gwneud unrhyw elynion, nac wedi rhoi unrhyw rheswm i unrhyw un wneud rhywbeth fel hyn.

Collodd y busnes hyd at £1,000 oherwydd y digwyddiad

Dywedodd perchennog Melys, Peris Tecwyn, wrth Cymru Fyw: "Mae'n golled o gannoedd o bunnoedd i'r busnes... hyd at £1,000 hwyrach.

"Ers y noson dwi wedi clywed fod yr un math o beth wedi digwydd i fusnesau eraill yng Nghaernarfon, Bontnewydd, Llanberis ac Abersoch.

"Mae'n bosib i ni addasu ein system fel bod pobl yn gorfod rhoi manylion cerdyn wrth archebu bwrdd, ond dydan ni ddim wir am wneud hynny ar hyn o bryd.

"Ond fe fyddwn ni'n gorfod ffonio pobl sydd wedi archebu bwrdd y noson gynt i wirio'r cwsmer. Ar y noson y digwyddodd hyn fe wnaethon ni ffonio sawl un o'r rhifau oedd wedi eu gadael gan bobl, a chanfod eu bod nhw'n rhifau ffug."

Mae'r busnes yn cyflogi 16 o bobl leol ac yn dweud eu bod yn cefnogi cwmnïau lleol eraill.

Gorffennodd y neges trwy ddweud: "Felly rhybudd i berchnogion busnes eraill yw hyn rhag ofn y bydd yr unigolyn trist hwn yn targedu pobl leol eraill yn y dyfodol."

Pynciau cysylltiedig

Straeon perthnasol