Prif leisydd band roc The Alarm yn glir o ganser

Ym mis Ebrill eleni cafodd Mike Peters ddiagnosis o Syndrom Richter, math peryglus o lymffoma

Mae prif leisydd y band roc The Alarm yn dweud ei fod yn glir o ganser am y tro.

Ym mis Ebrill eleni cafodd Mike Peters ddiagnosis o Syndrom Richter - math peryglus o lymffoma.

O ganlyniad, bu’n rhaid iddo ganslo perfformiadau o'i daith yn Unol Daleithiau America.

Dywed Mike Peters, sy’n wreiddiol o Dyserth ei fod yn glir o ganser wedi iddo gael triniaeth therapi abrofol mewn ysbyty ym Manceinion.

Ychwanegodd bod derbyn y newyddion yn “anhygoel”.

Mae Mike Peters wedi cael therapi newydd a thriniaeth cemotherapi

Cafodd Peters, sydd wedi cefnogi'r bandiau U2 a Status Quo ar deithiau, ddiagnosis o fath o lewcemia pan oedd yn 36 oed.

Ychydig ddiwrnod cyn oedd e i fod i hedfan i Chicago eleni daeth o hyd i lwmp yn ei wddf.

Cafodd ei gyfeirio i ysbyty Christie ym Manceinion ar gyfer therapi newydd oedd yn y cyffur acalabrutinib. Derbyniodd driniaeth cemotherapi yno hefyd.

Er bod y cyffur eisoes wedi'i gymeradwyo ar gyfer y math yma o lymffoma, nid yw wedi'i brofi ar y cyd â chemotherapi i drin Syndrom Richter.

Mae meddygon nawr eisiau dod o hyd i roddwr addas ar gyfer trawsblaniad bôn-gelloedd. Byddai hyn, medd arbenigwyr meddygol, yn gallu helpu atal y lewcemia rhag cydio eto.

'Cefnogaeth a gweddïau rhyfeddol'

Dywedodd y canwr fod y cyfan yn "anhygoel" a'i fod yn teimlo'n "ffodus" ei fod yn glir o ganser am y tro.

"Mae angen i mi nawr gael trawsblaniad bôn-gelloedd ac os yw'n llwyddiannus, gyda chymorth anhygoel y tîm yn Christie, fy nod yw gwella o gansyr am byth," meddai.

Mae hefyd wedi canmol y "gefnogaeth ryfeddol a gweddïau" gan filoedd o gefnogwyr.

Dywedodd yr Athro Adrian Bloor, haematolegydd ymgynghorol: "Y gobaith yw y bydd y cyfuniad o’r cyffur calabrutinib gyda chemotherapi yn effeithiol wrth drin syndrom Richter a'i atal rhag dod yn ôl."