Sêl bendith i ddau gais i godi 57 o dai fforddiadwy ym Môn

Mae cynghorwyr ar Ynys Môn wedi cymeradwyo dau gais cynllunio i adeiladu bron i 60 o dai fforddiadwy ar yr ynys.

Bwriad Cymdeithas Dai Clwyd Alyn a DU Construction yw adeiladu 27 o dai ger priffordd yr A55 yn Llanfairpwll, a 30 o dai yn Llandegfan.

Ond er bod gwrthwynebiad i’r datblygiadau, mae eraill yn gefnogol ac yn dweud bod mawr angen mwy o dai ar gyfer pobl leol yn yr ardal.

Roedd Cyngor Cymuned Cwm Cadnant wedi dadlau y byddai codi 30 o dai fforddiadwy yng Ngwel y Llan, Llandegfan yn "estyniad annerbyniol i'r pentref" ac yn cael effaith andwyol ar ddiogelwch ffordd a bioamrywiaeth.

Dywedodd Sioned Edwards, ar ran yr asiant, cwmni Cadnant Planning, y byddai'r tai yn Llanfairpwll - a gafodd eu cymeradwyo o bum pleidlais i bedwar - yn cael eu cynnig ar sail rhent fforddiadwy.

Does dim disgwyl cynnydd sylweddol mewn traffig, meddai, a bydd 'na fesurau i leihau sŵn o'r A55.

Ychwanegodd bod diffyg tai fforddiadwy lleol yn "argyfyngus" a byddai'r datblygiad yn helpu cyrraedd targedau a diwallu angen amlwg yn lleol.

Mae yna alw mawr yn lleol am gartrefi dwy a thair ystafell wely, medd Sioned Edwards ar ran asiant cynllunio'r datblygiadau

Dywedodd Ms Edwards cyn trafodaeth y pwyllgor cynllunio bod arolwg tai annibynnol "wedi adnabod bod 'na angen am dai fforddiadwy, drwy gyfarfod hefo pobl leol a deall yn well be' ydy'r anghenion a pha fath o dai maen nhw angen".

"Mae'r dystiolaeth yn dangos bod yr angen mwyaf am dai dwy a thair ystafell wely, felly mae'r cais wedi ei baratoi yn benodol i gyfarch y galw penodol yna."

"Mae 'na bobl leol wedi dweud wrthyn ni eu bod nhw angen tŷ yn lleol ac methu fforddio rhent ar y farchnad agored, a hefyd pobl ifanc sy'n chwilio a methu fforddio i brynu tŷ ac yn chwilio i rentu.

"Dwi'n deall fod pryder yn lleol ond 'swn i hefyd yn licio rhoi sicrwydd bod dim pryder gan arbenigwyr fod unrhyw fater technegol fysa'n atal y cais yma rhag caei ei gefnogi."

Clwyd Alyn fydd yn berchen ac yn rheoli'r stad drwy ddefnyddio polisi gosod Cyngor Môn.

Bydd 27 o dai yn cael ei godi ar y cae yma, ar ffin ardal datblygu Llanfairpwll, ger yr A55 a Stad y Garnedd

Wrth argymell caniatáu'r cais yn Llanfairpwll, dywedodd swyddogion cynllunio fod materion dŵr wyneb, arweinodd at wrthod y cais tebyg y llynedd, bellach wedi eu datrys.

Mae'r adran dai hefyd wedi cadarnhau fod 27 teulu ar y rhestr aros am dai fforddiadwy yn Llanfairpwll, bod 128 yn rhagor wedi datgan diddordeb, a bod Llanfairpwll yn "ddewis poblogaidd" am dai o'r math.

Ond dywedodd un o'r cynghorwyr lleol, Sonia Williams, bod deiseb â thros 1,000 o enwau wedi ei chyflwyno yn erbyn y cynllun.

Mae hi hefyd yn bryderus ynhylch yr effaith holl aflonyddwch y gwaith adeiladu ar fioamrywiaeth a bywyd gwyllt.

Cwestiynodd hefyd a fyddai'r ffens acwstig arfaethedig yn ddigon i liniaru sŵn o'r A55, gan bwysleisio bod Llanfairpwll yn dioddef problemau llifogydd a bod yna safleoedd eraill fwy addas.

"Does ond angen mynd i Lanfairpwll i weld pa mor ddrwg ydy'r traffig a'r goryrru ofnadwy drwy Llanfair," meddai.

Ychwanegodd un o gynghorwyr eraill y ward, Dyfed Jones, ei fod yn "lawn ddeall pwysigrwydd tai fforddiadwy" ond ei brif bryder oedd eu lleoli drws nesaf i'r A55.

Ategodd Robin Williams ei bryderon y byddai'r sŵn yn "ofnadwy", gan gwestiynu ffigyrau'r adroddiad am faint o draffig ychwanegol y byddai'r datblygiad yn ei achosi.

Ond ym marn y Cynghorydd Jeff Evans dyw'r dadleuon yn erbyn ddim yn ddigon i wrthod codi 27 o dai fforddiadwy, ac mae'n "hollol hyderus" y byddai'r cais yn cael ei ganiatáu ar apêl gyda'r cyngor yn gorfod talu costau'r ymgeisydd.

'Pam ddim adeiladu pentref newydd?!'

Er mwyn cyrraedd y safle byddai angen mynd trwy Stad y Garnedd, ac mae rhai o drigolion yn stad wedi datgan gwrthwynebiad.

Maen nhw’n dweud bod y safle’n anaddas ar gyfer datblygiad o'r fath, gan waethygu problemau traffig sydd eisoes ger y stad ac yn Llanfairpwll yn gyffredinol.

"Dwi'n clywed y traffig, 'swn i ddim yn licio byw yn y cae 'ma," meddai Medwyn Roberts, ar ran Cymdeithas Amddiffyn Stad y Garnedd.

"'Dan ni'n sôn am adeiladu 27 o dai ar gae sydd hanner maint y stad 'ma, a 24 o dai sydd yma.

Dywedodd Medwyn Roberts fod y "cyngor cymuned wedi bod yn gyson yn erbyn" y cynlluniau

"Yn y ddwy flynedd ddiwethaf mae traffig wedi mynd yn waeth byth a mae 'na geir yn bob man.

"Mae'r gymuned i gyd mwy neu lai yn erbyn y datblygiad yma. Mae'r cyngor cymuned wedi bod yn gyson yn erbyn.

"Mae'r pentref 'ma wedi ei ddatblygu gymaint yn y deugain mlynedd ddiwetha' heb feddwl am yr amgylchiadau."

Ychwanegodd: "Pam fod rhaid i drigolion y pentref roi i fyny hefo hyn? 'Dan ni fel y werin ddim yn cael gwybod pwy sydd ar y rhestrau aros yma.

"Os oes gymaint â hyn o ddymuniad am dai fforddiadwy, pam 'neith y cyngor sir ddim adeiladu pentref newydd?!

"Mae 'na ddigon o dir yn Sir Fôn i godi tai, siopau, lle doctor newydd."

Mae'r safle yn ffinio'r A55 ar un ochr a Stad y Garnedd ar y llall

'Y rhai sy'n gwrthwynebu hefo tai yn barod'

Roedd swyddogion cynllunio'r sir wedi argymell caniatáu’r ddau gais, er gwaethaf pryderon yn y ddwy gymuned.

Ond mae 'na gefnogaeth hefyd ymhlith pobl ifanc yn yr ardal, sy’n poeni sut y gallan nhw fforddio prynu tŷ yn y cyffiniau.

Dywedodd Ffion Elin Davies, 26, sydd o Lanfairpwll ond bellach yn byw ym Mhorthaethwy gyda'i theulu, bod hi'n "beth da" bod tai fforddiadwy yn cael eu cynnig.

"Mae Ynys Môn yn le grêt i fyw a dwi'n siŵr fod pobl ifanc isio aros yma, a dwi o blaid y syniad," meddai.

Ffion Elin Davies: "Heb i ni allu fforddio tai yn ein hardaloedd lleol mae'n bosib bydd rhaid i ni symud i ffwrdd"

"Mae'n anodd i unrhyw un rŵan i brynu tai. 'Di o ddim yr un fath â pan oedd ein rhieni yn prynu tai - mae'r prisiau wedi codi yn anffodus.

"Does dim allwn wneud am hynny ond mae'r tai fforddiadwy 'ma yn ffordd i symud ymlaen.

"Dwi'n teimlo na'r bobl sy'n gwrthwynebu ydy'r rhai sydd hefo tai yn barod ac yn anffodus ddim yn yr un sgidia' â ni.

"Dwi'n deall safbwynt y rhai sy'n gwrthwynebu. Codi mwy o dai yn eu hardal nhw sydd mor brydferth... dwi'n deall yn iawn, ond rhaid i ni feddwl am ffyrdd o sut 'da ni'n symud ymlaen.

"Heb i ni allu fforddio tai yn ein hardaloedd lleol mae'n bosib bydd rhaid i ni symud i ffwrdd i le allwn ni fforddio, ond mae'n bwysig i ni allu aros yn eu cynefinoedd."