13 o blant wedi'u hanafu ar ôl damwain reid ffair

Cafodd nifer o bobl eu cludo i'r ysbyty yn dilyn y digwyddiad ym Mharc Pleser Traeth Coney

Cafodd 13 o blant ac un oedolyn fân anafiadau ym Mhorthcawl nos Fercher yn dilyn damwain yn ymwneud â reid ym Mharc Pleser Traeth Coney.

Bu'n rhaid cludo rhai i'r ysbyty am driniaeth yn dilyn y digwyddiad ar reid Wacky Worm y parc.

Mewn lluniau ar y cyfryngau cymdeithasol mae oedolion i'w gweld yn helpu nifer o blant oddi ar y reid.

Roedd yna gyngor gan Heddlu De Cymru i'r cyhoedd i osgoi'r ardal, ac mae'r parc ar gau ddydd Iau wrth i ymchwiliad gael ei gynnal.

Dywedodd llefarydd ar ran y Gweithgor Iechyd a Diogelwch bod eu harolygwyr "ar y safle ddydd Iau i ddechrau ymholiadau" a bod yr heddlu'n eu cynorthwyo.

Dywedodd John Paul Baylis bod ei fab wedi cael sioc ar ôl y digwyddiad

Dywedodd John Paul Baylis o Borthcawl bod diwrnod gyda'i deulu wedi troi yn hunllef ar ôl y digwyddiad.

"Fe wnes i glywed bang ofnadwy, sgrechian uchel, mae'n anodd disgrifio roedd e'n erchyll", meddai.

Dywedodd bod ei fab Ethan, sy'n wyth oed, wedi cael anaf i'w ben ac wedi cael braw o'r digwyddiad.

"Wnes i neidio dros y giat, dringo'r reid, cael fy mab i lawr a'i basio at dad arall.

"Yn syth ar ôl ei basio fo es i at gerbyd arall ar y reid a gweld gwaed, roedd y sgrechian yn uchel yn fy nghlustiau, roedd e'n ofnadwy."

Cafodd y gwasanaethau brys eu galw i'r parc pleser tua 17:50 brynhawn Mercher

Mewn neges ar y cyfryngau cymdeithasol dywedodd llefarydd ar ran Parc Pleser Traeth Coney mai reid sy'n eiddo i gwmni arall, yn hytrach na'r parc ei hun, yw'r Wacky Worm.

Dywedodd eu bod "wedi cael gorchymyn gan yr heddlu i glirio'r safle ar gyfer ymchwiliad pellach" yn dilyn y ddamwain.

"Rydym yn ymddiheuro am unrhyw amhariad ac fe fydd ymwelwyr yr effeithiwyd arnynt yn cael arian yn ôl cyn gynted â phosib," ychwanegodd.

"Byddwn yn cyhoeddi canllawiau ar sut i hawlio ad-daliad yn fuan."

Roedd plant yn "sgrechian", medd Rebecca Eccleston, wedi i ran o gerbyd y reid ddod oddi ar y cledrau

Roedd Rebecca Eccleston, 22, o Lanilltud Fawr, yn y parc gyda'i mab a nifer fawr o ffrindiau pan ddigwyddodd y ddamwain.

"Roedd popeth yn iawn a'r plant yn mwynhau eu hunain a mwya' sydyn roedd yna bang anferthol," dywedodd.

"Wnes i droi ac roedd rheilin metal wedi syrthio ar fy ysgwydd dde a'r pram."

Dywedodd bod eio mab blwydd oed, Theo, yn y pram, ond ei fod ond wedi cael ambell clais o'r herwydd.

"Oni bai am fy ffrind fydda'i wedi bod yn stori hollol wahanol... fe stopiodd hi'r impact gyda'i hysgwydd."

Roedd yna gyngor gan yr heddlu i'r cyhoedd osgoi'r ardal

Dywedodd Ms Ecceleston ei bod wedi gweld plant yn "sgrechian" a "gweiddi".

"Roedd un cerbyd ar gefn y reid wedi dod oddi ar y cledrau yn gyfan gwbl.

"Doedd neb yn gallu dod oddi arno ac fe redodd partner fy ffrind yn syth i nôl y plant."

Ychwanegodd bod un o'r plant wedi gorfod mynd i'r ysbyty ar ôl "colli ei ddannedd ar fariau" y reid.

Dywedodd llefarydd ar ran Gwasanaeth Ambiwlans Cymru bod parafeddygon, sawl ambiwlans a thîm ymateb wedi eu hanfon i'r parc mewn ymateb i alwadau brys.