Pobl yn ôl yn eu tai ar ôl i dair bom gael eu canfod mewn gardd

Mae'r heddlu wedi cadarnhau fod tair bom Almaenaidd o'r Ail Ryfel Byd wedi cael eu "symud yn ddiogel"

Mae trigolion mewn tref ger Caerdydd wedi cael dychwelyd adref, ar ôl cael eu symud yn dilyn darganfod tair bom mewn gardd.

Cafodd yr heddlu eu galw i Stryd Plassey ym Mhenarth am tua 13:30 ddydd Mawrth, yn dilyn darganfod y bomiau, oedd heb ffrwydro - o gyfnod yr Ail Ryfel Byd.

Cafodd tua 50 o gartrefi eu gwagio tra bod y dyfeisiau'n cael eu harchwilio a'u gwneud yn ddiogel, meddai Heddlu'r De.

Mae'r heddlu wedi cadarnhau fod y tair bom Almaenaidd wedi cael eu "symud yn ddiogel" ers hynny a bod y trigolion wedi cael caniatâd i fynd adref.

Mewn datganiad, diolchodd yr heddlu i'r arbenigwyr gwaredu bomiau am eu cymorth ac i'r cyhoedd am eu hamynedd a'u dealltwriaeth.

Cafodd tua 50 o gartrefi eu gwagio tra bod y dyfeisiau'n cael eu harchwilio