Tref glan môr 'ar agor' er bod rhan o brif ffordd ynghau am ddeufis

Bydd rhan o'r A487 yn Nhfredraeth ar gau am wyth wythnos

Mae busnesau mewn tref glan môr yn Sir Benfro yn mynnu y byddan nhw'n parhau ar agor er gwaethaf cau ffordd am tua wyth wythnos yn y flwyddyn newydd.

Bydd gwaith hanfodol yn cael ei wneud i adnewyddu cwlfer sy'n croesi o dan yr A487 sy'n rhedeg trwy ganol Trefdraeth.

Bydd dargyfeiriadau lleol yn eu lle ar gyfer ceir a faniau bach, ond bydd cerbydau nwyddau trwm yn wynebu llwybr dargyfeirio hirach, tua 35 milltir o hyd.

Yn ôl Llywodraeth Cymru, ailosod llawn yw'r unig opsiwn gan nad oes modd atgyweirio'r strwythur presennol.

Bydd y gwaith, sy'n golygu ailosod system ddraenio, yn dechrau o 6 Ionawr tan o leiaf 28 Chwefror.

Bydd cau'r ffordd yn ergyd i'r economi yn ôl y cynghorydd sir, Huw Murphy

Mae'r cynghorydd sir lleol yn credu y bydd cau'r ffordd yn cael effaith negyddol ar yr economi leol.

"Mae traffig yn mynd a dod drwy'r amser tra bo' ni'n siarad nawr," meddai Huw Murphy.

"Ma' hwn yn ardal sy'n dibynnu ar dwristiaeth, mae e'n dibynnu ar ymwelwyr ac os fydd y ffordd ar gau am gyfnod o bron i ddau fis, mae e'n mynd i gael ergyd ar y gymuned a'r busnesau sy'n dibynnu ar ymwelwyr."

'Gwell yn y gaeaf na'r haf'

Bydd llwybr dargyfeirio lleol byr iawn mewn lle ar gyfer ceir a faniau bach llai na 3.5 tunnell, a hynny ar hyd y Stryd Uchaf y Bont/Stryd Uchaf y Gorllewin.

Mae hon yn ffordd trac sengl sy'n anaddas ar gyfer cerbydau mawr.

Bydd cerbydau nwyddau trwm yn dilyn llwybr dargyfeirio hirach, tua 35 milltir o hyd.

Bydd y llwybr dargyfeirio lleol ar hyd Stryd Uchaf y Bont/Stryd y Gorllewin yn anaddas ar gyfer cerbydau mawr

Mae Mark Cole, sy'n gweithio yng nghanol Trefdraeth yn rhybuddio y bydd yn rhaid i yrwyr fod yn ofalus.

"Bydd rhaid i bawb gymryd pwyll," meddai.

"Bydd e'n anodd i'r cwmnïau bysiau, wrth gwrs, gyda phawb fydd yn teithio o Aberteifi i Abergwaun ond fe fyddan nhw wedi penderfynu a gwneud plans ymlaen llaw i weithio o gwmpas yr wyth wythnos.

"Mae'n mynd i fod yn amser anodd amser fydd yr hewl ar gau ond mae'n rhaid gwneud y gwaith."

Mae Mark Cole yn cydnabod bod y gwaith ffordd yn hanfodol

"Y broblem gyda Threfdraeth yw mae'n hen dref, mae gyda ni [Mynydd] Carningli un ochr a'r môr yr ochr arall, a hewlydd cul yn y canol.

"Mae e'n mynd i gael trafferthion yn y cyfnod mae e'n digwydd ond mae e yn well bod e'n digwydd yn y gaeaf nac yn yr haf."

Bydd y ffordd am gyfnod sy'n cynnwys wythnos hanner tymor ym mis Chwefror.

Mae Elin Phillips wedi gweithio yn siop anrhegion Angel House yn y dref ers bron i 18 mlynedd.

Mae hi hefyd yn poeni fydd pobl yn cadw draw oherwydd y gwaith ffordd.

Mae busnesau Trefdraeth dal ar agor yw neges Elin Phillips

"Mae e'n mynd i effeithio busnesau, yn amlwg, ond mae eisiau pobl i ddeall ein bod ni dal ar agor," meddai Ms Phillips.

"Dwi ar ddeall bod traffic lights yn mynd i fod ar y top, felly gallan nhw [ceir] ddod mewn ffordd 'na ond dim lories, tractors, ffermwyr, fe fydd hi'n galed arnyn nhw.

"Byddan nhw'n gorfod mynd rownd Crymych, Abergwaun i ddod lawr."

Mae'r cwlfer sydd angen ei adnewyddu yn croesi o dan yr A487

Dywedodd Llywodraeth Cymru eu bod wedi cynnal ymgynghoriadau i benderfynu pa adeg o'r flwyddyn fyddai orau er mwyn lleihau'r effaith ar yr ardal, a bod cymorth uniongyrchol gan Busnes Cymru ar gael i fusnesau sy'n wynebu ansicrwydd oherwydd bod y ffordd ar gau.

Ond mae rhai busnesau yn y dref yn honni nad ydyn nhw wedi wedi cael cynnig iawndal.

Yn ôl Llywodraeth Cymru bydd y gwaith yn sicrhau "gwytnwch hirdymor y ffordd a lliniaru yn erbyn effeithiau newid hinsawdd".

"Ailosod llawn oedd yr unig opsiwn gan nad oedd modd atgyweirio'r strwythur presennol… Mae'r gwaith hwn yn hanfodol er mwyn sicrhau y gall y ffordd aros ar agor yn y blynyddoedd i ddod."