Yr actor Martin Clunes yn un o brif feirniaid y Sioe Fawr eleni

Mae'r Sioe Frenhinol wedi cyhoeddi y bydd un o actorion mwyaf adnabyddus y sgrin fach ym Mhrydain yn beirniadu ym mhrif bencampwriaeth y ceffylau yn y Sioe Fawr eleni.

Mae Martin Clunes, sy'n enwog am chwarae rhan Gary Strang yng nghyfres 'Men Behaving Badly' a'r prif gymeriad yn Doc Martin hefyd yn hoff iawn o geffylau.

Mae eisoes yn gadeirydd y Gymdeithas Geffylau Prydeinig, ac eleni bydd yn beirniadu yn y brif gystadleuaeth ceffylau yn Llanelwedd.

Dywedodd Cadeirydd Cyngor Cymdeithas y Sioe Frenhinol, sydd hefyd yn sylwebu yn y cylch ceffylau yn y Sioe, Nicola Davies ar raglen Dros Frecwast fod "pawb yn edrych ymlaen yn fawr".

Mae Martin Clunes yn cadw ac yn marchogaeth ceffylau

"Mae pawb yn ei ystyried fel actor ond mae gan bob actor fywyd y tu fas i actio, eu bywyd preifat. Mae'n magu ceffylau Clydesdale sef ceffylau gwaith, mae o hefyd yn marchogaeth ac felly mae ganddo dipyn o brofiad. Mae'n braf gallu rhoi ychydig o sioc i bobl a bod yr enw yn codi gwên.

"Rydyn ni yn trio, ar gyfer ein prif bencampwriaethau i ddenu enwau mawr, enwau sydd hefyd â diddordeb ac adnabyddiaeth o geffylau - does dim pwynt cael enwau mawr sydd ddim yn deall unrhyw beth am geffyl.

"Dwi'n credu ei fod e'n denu diddordeb, mae gan bobl ddiddordeb mewn beth mae e am ei wneud, ydy e am fynd am y ceffyl marchogaeth, ydy e am fynd am y ceffyl gyrru neu geffyl yn y llaw?

"Ni wedi cael enwau mawr, ni wedi cael Carl Hester o'r blaen, sydd wedi ennill yn y gemau Olympaidd a Richard Johnson, joci sydd wedi ennill Cheltenham, ond y tro hyn - actor adnabyddus," meddai.

Nicola Davies yw Cadeirydd Cyngor Cymdeithas y Sioe Frenhinol

Mae'r gystadleuaeth fawreddog yn coroni'r ceffylau a'r merlod gorau gyda miloedd yn ceisio cipio'r wobr.

Ychwanegodd Nicola Davies: "Mae tua 2500-3000 o geffylau yn y catalog, felly mae angen dewis y gorau o'r miloedd yna. Mae'n dipyn o fraint ac mae'n dipyn o gyfrifoldeb, ond mae pob beirniaid hyd yn hyn wedi mwynhau.

Mewn datganiad yn ymateb i'r cyhoeddiad, dywedodd Martin Clunes ei bod hi'n "fraint fawr cael fy ngwahodd i feirniadu.

"Mae'r sioe yn un o uchafbwyntiau'r calendr amaethyddol a marchogaeth, a dwi'n edrych ymlaen yn fawr at weld safon uchel y ceffylau fydd yn cael eu harddangos," meddai.

Bydd y sioe eleni yn cael ei chynnal yn Llanelwedd rhwng 21-24 o Orffennaf, ac yn ôl Nicola mae'r trefniadau yn prysur fynd yn eu blaenau, ac fe soniodd pa mor falch oedden nhw fel cyngor fod Martin Clunes wedi cytuno i feirniadu yno eleni.

"Dwi'n credu mai ni yw'r sioe gyntaf sydd wedi ei gael i feirniadu, mae'n sioe sy'n adnabyddus iawn, ac os y'ch chi mo'yn beirniadu'r gorau, mae'n rhaid i chi ddod i Sioe Frenhinol Cymru, wrth gwrs."