Achub pedwar wedi i gar droi ar ei ochr ger cronfa ddŵr

Y cerbyd ar ei ochr ger Cronfa Ddŵr Claerwen yng Nghwm Elan

Cafodd person ei gludo i'r ysbyty ar ôl i gar droi drosodd yn agos at ochr cronfa ddŵr ddydd Iau.

Cafodd y gwasanaethau brys eu galw i wrthdrawiad un cerbyd ger Cronfa Ddŵr Claerwen yng Nghwm Elan, Rhaeadr toc cyn 16:00.

Roedd y cerbyd ar ei ochr ar ôl troi drosodd ger y gronfa ddŵr, yn ôl Gwasanaeth Tân ac Achub Canolbarth a Gorllewin Cymru.

Roedd pedwar o bobl yn y gwrthdrawiad, a chafodd un person ei gludo i'r ysbyty mewn hofrennydd Gwylwyr y Glannau.

Nid oes mwy o fanylion am gyflwr y person sydd yn yr ysbyty.

Dywedodd y gwasanaeth tân fod y digwyddiad hwn yn "arbennig o heriol oherwydd diffyg golau, tirwedd anodd, agosrwydd at ymyl y dŵr, signal radio a ffôn gwael ac amodau rhewllyd".

Fe wnaeth y gwasanaeth tân adael y lleoliad toc cyn 21:00.