Siom i'r Bala a Chei Connah yng Nghyngres Europa

Elliott Dugan o dîm Cei Connah yn ystod y gêm

Roedd torcalon hwyr i’r Bala a Chei Connah yng Nghyngres Europa nos Iau.

Collodd Cei Connah o 2-1 ar gyfanswm goliau yn erbyn NK Bravo gyda goliau hwyr yn sicrhau lle y tîm o Slofenia yn y rownd nesaf.

Roedd Cei Connah, deiliaid Cwpan Cymru, wedi ennill y cymal cyntaf 1-0 wythnos ynghynt.

Yn chwarae'r cymal cartref ym Mangor, daeth y tîm cartref o fewn munudau i sicrhau eu lle yn y rownd nesaf ond fe sgoriodd Nemanja Jaksic yn hwyr.

Gyda phum munud o'r hanner awr o amser ychwanegol yn weddill fe sgoriodd Matej Poplatnik gyda pheniad i roi buddugoliaeth i'r ymwelwyr.

Fe sgoriodd Nathan Peate gôl yn yr hanner cyntaf cyn iddo gael ei yrru o’r maes ar ôl derbyn cerdyn coch

Yn gynharach yn Estonia roedd siom i'r Bala wedi i Paide sgorio gôl hwyr

Roedd Bala wedi colli 2-1 ar gae Neuadd y Parc wythnos ynghynt ond roedd cic o’r smotyn hwyr Josh Ukek wedi rhoi gobaith i dîm Colin Caton cyn yr ail gymal.

Fe aeth Y Bala ar y blaen wedi 13 munud gyda’r capten Nathan Peate yn penio cic gornel Lassana Mendes i gefn y rhwyd.

Cafodd y ddau dîm gyfleoedd wedi hynny ond gyda'r un yn gallu manteisio ar hynny o fewn y 90 munud, fe gafwyd hanner awr o amser ychwanegol.

Cafodd Peate ei yrru o’r maes ar ôl derbyn ail gerdyn melyn a gyda chiciau o’r smotyn yn nesáu, torrwyd calonnau'r ymwelwyr yn yr amser a ychwanegwyd ar gyfer anafiadau pan sgoriodd Oskar Holm i’r tîm cartref.

Daeth hynny â Paide yn gyfartal ar y noson, ond roedd yn ddigon i sicrhau buddugoliaeth o 3-2 dros y ddau gymal - gan sicrhau eu lle yn y rownd nesaf.