Heddlu yn ymchwilio i farwolaeth bachgen mewn ffair yn y de
Cafodd y llu eu galw i'r ffair ym Mro Morgannwg ddydd Gwener, am tua 17:00
- Cyhoeddwyd
Mae Heddlu'r De yn ymchwilio i farwolaeth bachgen 16 oed, wnaeth ddioddef yr hyn y maen nhw'n ei ddisgrifio fel "digwyddiad meddygol" ar Ynys y Barri.
Dywedodd yr heddlu fod swyddogion yn ceisio "canfod yr amgylchiadau llawn" i farwolaeth y bachgen yn y Parc Pleser.
Cafodd y llu eu galw i'r ffair ym Mro Morgannwg ddydd Gwener, am tua 17:00.
Dywedodd llefarydd yr heddlu eu bod yn apelio ar unrhyw un oedd yn y Parc Pleser yn ystod y digwyddiad, sydd â gwybodaeth, i gysylltu gyda nhw.
Dywedodd y parc fod y newyddion am y farwolaeth yn drist iawn a bod eu tîm "wedi gwneud eu gorau i gynorthwyo'r gwasanaethau brys" ar y pryd.
"Mae ein meddyliau a'n gweddïau gyda'r teulu ar yr amser trist iawn hwn."
Mae'r parc yn parhau i fod ar agor ers 11:00 fore Sadwrn.