Ai nawr yw cyfle Elfyn Evans i ddod yn bencampwr rali'r byd?

Mae Elfyn Evans yn arwain Pencampwriaeth Rali'r Byd o 13 pwynt

Gyda dwy ras yn weddill o'r tymor ralio, ai Cymro fydd yn cael ei goroni'n bencampwr byd?

Mae Elfyn Evans o Ddinas Mawddwy ar frig y bencampwriaeth gyda dwy rownd yn weddill.

Rali Japan yw'r targed ar hyn o bryd, sy'n digwydd rhwng dydd Iau a dydd Sul yr wythnos hon, cyn i'r tymor ddod i ben yn Saudi Arabia ddiwedd mis Tachwedd.

Ond stori o fod yn agos ati yw un Evans ar hyd y blynyddoedd, ag yntau wedi dod yn ail yn y bencampwriaeth ar bedwar achlysur.

A dyw Evans yn bendant ddim am roi'r cart o flaen y ceffyl.

"'Da ni 'di bod yn y sefyllfa yma ambell waith o'r blaen, a 'leni 'da ni wedi bod mewn ac allan o frig y bencampwriaeth," meddai mewn cyfweliad â BBC Cymru yr wythnos hon.

"Ond 'da ni hefyd yn gwybod faint o agored yw popeth - mae 'na lot o bwyntiau ar gael dros y ddwy rownd ola' 'ma rŵan.

"Wedyn all rhywbeth ddigwydd dal, felly 'da ni ddim yn poeni gormod amdano fo ar y pwynt yma."

Mae Elfyn Evans wedi cael llwyddiant yn Japan yn y gorffennol, gan ennill yno yn 2023 a 2024

Mae'r ras am y bencampwriaeth yn un agos, gydag Evans ar 247 o bwyntiau.

Yn dynn ar ei sodlau mae Kalle Rovanperä a Sébastien Ogier ar 234.

Mae'r tri uchaf yn rasio i'r un tîm hefyd - Toyota Gazoo Racing.

Mae'n golygu bod popeth yn y fantol wrth fynd i'r rowndiau olaf.

'Sefyllfa gyfarwydd iawn'

Un peth sy'n hwb i Evans yn Japan ydy llwyddiant yn y gorffennol, ag yntau wedi ennill yno yn 2023 a 2024.

"Mae'n un o'r ralis mwya' technegol ar y calendr o ran y ralis tarmac - mae'r ffyrdd yn gul dros ben," meddai.

"Wedyn, yn y goedwig mae'r dail o hyd yn cwympo adeg yma'r flwyddyn, sydd yn 'neud pethau'n llithrig dros ben."

"Ni'n gwybod yn y byd ralio, mae unrhywbeth yn gallu digwydd," meddai Hana Medi

Yn ôl cyflwynydd rhaglen Ralio+ ar S4C, Hana Medi, mae'r sefyllfa yn un gyfarwydd i Elfyn Evans.

"13 pwynt o fantais sydd gan Elfyn ar frig y tabl, a mae 'na 35 o bwyntiau ar gael ymhob rali," meddai.

"Felly mae 'na uchafswm o 70 o bwyntiau ar gael dros y ddwy rali nesa' 'ma.

"Ni'n gwybod yn y byd ralio, mae unrhywbeth yn gallu digwydd.

"Mae'r sefyllfa yma yn gyfarwydd iawn i Elfyn, a ni'n cofio 'nol i Monza yn 2020.

"Rali ola'r tymor pan mai fe oedd y ffefryn i ennill, ac yn y rhew a'r iâ 'naeth y car lithro o'r ffordd, a daeth ei obeithion i ennill y bencampwriaeth i ben yn y fan a'r lle."

Saudi Arabia fydd rownd ola'r tymor - ras newydd fydd yn cynnig her i bob tîm.

Ai Jeddah felly fydd y man i'r Cymro cyntaf tu ol i'r olwyn godi tlws Pencampwriaeth Rali'r Byd?

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.