Y tŷ â dros 1,700 o fygiau

Yng nghanol cefn gwlad Ceredigion mewn tŷ fferm ym mhentref Bethania mae yno ryfeddod i’w weld – dros 1,700 o fygiau mewn un cegin.

Mae gan Catherine Woodwards gasgliad o dros 1,700 o fygiau.

Mae Catherine Woodward yn casglu mygiau ers 1972 pan gafodd un yn anrheg gan ddisgybl yn yr ysgol yr oedd hi’n gogyddes ynddi.

Eleni, fe ddathlodd Catherine Woodward ei phen-blwydd yn 80 mlwydd oed ac, wrth reswm, fe ddaeth y mygiau’n anrhegion rif y gwlith. Un o’r mygiau hynny oedd un wedi’i wneud yn arbennig iddi gan dîm Bore Cothi ar BBC Radio Cymru.

Mae cannoedd o fygiau amryliw yn hongian ar ddistiau cegin y tŷ fferm.

Bu Catherine yn westai pen-blwydd ar y rhaglen foreol boblogaidd yn ôl ym mis Mai eleni a bryd hynny fe wnaeth Shân addewid iddi y byddai'n anfon mwg Bore Cothi ati. Ond yr wythnos hon, fe wnaeth Shân un yn well a’i ddanfon yno ei hun.

Gyda help cyfrwys ei hwyres, Emily, llwyddodd y criw i roi sypreis a hanner i Catherine pan laniodd Shân ar y stepen drws gyda’r mwg a chamera i ddal y cyfan.

Pryd dechreuodd y casglu?

“O’n i’n gogyddes Ysgol Penuwch a’r plant yn rhoi rhai gyda’n enw i arno. Oedd hynny yn ’72 pan dechreuais i yn yr ysgol. Pryd hynny ddechreuodd e chi’n gwybod. A maen nhw’n newydd i gyd chi’n gwybod – dim byd second hand a dim chip yn agos iddyn nhw!”

“Dw i ddim wedi prynu dim un. Eu cael nhw ydw i. Mae ‘da fi chwe chwaer a brawd a phan maen nhw’n mynd ar eu gwylie maen nhw’n dod a mwg yn ôl i fi.”

Faint sydd gennych chi?

“Mae dros 1,700 yma nawr. Maen nhw lan ar y beams yn y kitchen a wedyn bob ochr i’r staer yn mynd lan i’r llofft. Fi’n glanhau nhw ddwywaith y flwyddyn. ”

Catherine gyda Shân a Iolo Williams yn 2015 pan ymwelon nhw â hi ar gyfer y rhaglen Bro – ers hynny mae ganddi 700 yn fwy o fygiau.

Oes gennych chi ffefryn?

“O na, allwch chi byth a dweud ‘ny chi’n gweld neu byddwch chi’n offendo rhywun! O’n i’n gwybod pwy oedd wedi dod â phob un ond pan gorffon ni dynnu nhw lawr, dim sbel yn ôl nawr achos bod gweithwyr angen mynd lan y staer, maen nhw wedi cymysgu. Ond cyn hynny, o’n i’n gwybod gan bwy ac o le oedden nhw wedi dod. ”

Oes pobl yn dod i’w gweld nhw?

“Oes oes, mae sawl un wedi bod yn eu gweld nhw, sawl cymdeithas a pethe. Unwaith, dd’wedon nhw ‘dim ond hanner awr byddwn ni‘da chi, ni mewn mini-bus’ ond buon nhw ‘ma tair awr! Mae’n werth eu gweld nhw.”

Dros 1,700 o fygiau

Mae'r erthygl hon yn addasiad o sgwrs fu ar Bore Cothi ar 9 Mai, 2023.