Còmhraidhean ann às ùr mu ICT a cheannach

Tha luchd-rianachd Chaley Thistle ag ràdh gu bheil iad ann an còmhraidhean às ùr le grunn bhuidhnean aig a bheil ùidh sa chluba a cheannach.

Thàinig seo às dèidh mar a chaidh adhartas a dhèanamh a thaobh chnapan-starra a bha air ICT a chur "ann an cunnart mòr".

Tha an cluba air a bhith ann an rianachd bhon Dàmhair an-uiridh ach nochd ceistean mòra mu na bha fa-near dhàibh nas tràithe air a' mhìos seo nuair a dh'innis an luchd-rianachd nach deach tairgsean sam bith a dhèanamh airson an cluba a cheannach.

Thuirt BDO gun robh bacaidhean ann gu sònraichte mu iasadan mòra (mu £3.5m) do dhaoine a bha nan stiùirichean air ICT, is mu dheidhinn mar a tha earrainnean a' chluba air an sgaoileadh le ceist am faigheadh buidheann a cheannaicheadh an cluba làn-smachd.

Bha dragh ann cuideachd mu mhì-chinnt mu cò leis a bheil fearann timcheall Pàirc ICT.

Ann am brath ùr feasgar Diardaoin, thuirt BDO gun robh "deagh choinneamh" ann le feadhainn a thug iasadan seachad roimhe, cuid le tòrr earrainnean, is seann stiùiriche.

Thuirt iad gun deach aonta a ruighinn gus seann iasadan a chur an dàrna taobh agus earrainnean a thilleadh chun a' chluba.

Bhiodh seo a rèir ICT a bhith a' tighinn a-mach à rianachd is a' leantainn mar chluba.

Thuirt BDO cuideachd gu bheil còmhraidhean ann às ùr le "4-5" buidhnean a thaobh tairgse a dhèanamh 'son an cluba a cheannach.

Tha iad ag ràdh gun lean na còmhraidhean seo tron Ghiblean.

Thuirt BDO gu bheil iad "air an dòigh" leis na gluasadan seo is thug iad taing dhan fheadhainn a thàinig gu aonta a thaobh iasadan is earrainnean.