Obraichean gus falbh aig Organic Sea Harvest Dihaoine

Tha BBC Naidheachdan a' tuigsinn gun caill 18 duine an cosnaidhean aig Organic Sea Harvest san Eilean Sgitheanach Dihaoine agus tuilleadh anns na prìomh oifisean ann an Inbhir Ghòrdain.

Aig an dearbh àm, thàinig naidheachd gun do shoirbhich le ath-thagradh a rinn Organic Sea Harvest 'son cead-dealbhachaidh fhaighinn airson tuathanas-eisg far chladach Fhlòdaigearraidh.

Dh'innis a' chompanaidh aig toiseach a' Mhàirt gun robh iad a' sguir den chuid obrach aig an dà thuathanas a tha aca air costa ear thuath an Eilein Sgitheanaich.

Thuirt OSH gun robh iad air ruith a-mach à airgead agus gum biodh iad a' falamhachadh nan cèidseachean aca gus an gabh tuilleadh airgid a lorg airson an dà làraich sin, agus 'son làrach eile ùr faisg air Baile MhicCuithein aig a bheil cead-dealbhachaidh aca a leudachadh.

Thàinig e am bàrr às dèidh sin gun robh Mowi air an t-iasg air fad a cheannach bho Organic Sea Harvest às dèidh chòmhraidhean eadar na companaidhean.

Ged a dh'fhosgail na companaidhean dà làrach faisg air Inbhir Thobhta is Cùl nan Cnoc anns na bliadhnaichean mu dheireadh, chaidh maill air na h-oidhirpean aca làraichean eile a stèidheachadh faisg air Baile MhicCuithein is Flòdaigearraidh is cuid ag iomairt nan aghaidh is cead-dealbhachaidh air a dhiùltadh.

Air a' chean thall fhuair OSH cead an-uiridh bho Chomhairle na Gàidhealtachd airson a' phròiseict faisg air Baile MhicCuithein, ged nach eil iad air a leasachadh fhathast.

Agus tha Riaghaltas na h-Alba a-nise air cead a thoirt seachad airson leasachadh Fhlòdaigearraidh às dèidh ath-thagradh bhon chompanaidh.

Tha e coltach nach dèan sin diofar a thaobh nan cosnaidhean aig OSH san Eilean Sgitheanach ge-tà, is am BBC a' tuigsinn gum falbh na dreuchdan uile san eilean - 18 - Dihaoine.

Bidh call cosnaidh aig an làraich aca aig ann an Inbhir Ghòrdain cuideachd.

Tha am BBC air beachd iarraidh bho Organic Sea Harvest agus Mowi.