Maoineachadh 'son bàt'-aiseig an àite an Lord of the Isles

Thuirt Rùnaire na Còmhdhail, Fiona Hyslop, gum bi maoineachadh ann 'son bàta an àite an Lord of the Isles aig 'coinneimh èiginn' mu aiseagan.

Tha dùil gun toir e trì bliadhna airson am maoineachadh sin a thoirt gu buil.

Gheall i cuideachd gun tèid coimhead ri leasachadh a dhèanamh air cìdhe Ghàsaigh.

Tha Rùnaire na Còmhdhail an sàs ann an coinneimh èiginnich a dh'iarr muinntir Uibhist a Deas mu shuidheachadh nan aiseagan.

Thuirt an Rùnaire: "Cuimhnich gum bi sia soithichean ùra a' tighinn a-steach thairis air a' bhliadhna a tha romhainn, sin a' gabhail a-steach an Glen Sannox a tha mar-thà ann an seirbheis, mar sin 's e deagh naidheachd a tha sin.

"Tha mi cuideachd air a bhith comasach air innse dhan choimhearsnachd gum faodadh am bàta a bhios a' dol an àite an Lord of the Isles a dhol a-mach gu tairgse, tha maoineachadh airson sin ann am buidseat na h-Alba ann an 2025-26.

"Agus tha sinn cuideachd a' dol a dh'fhaicinn na h-obrach 'son Cidhe Ghàsaigh a leasachadh, le obair-sgrùdaidh air an làraich a' toiseachadh am-bliadhna.

"Mar sin, 's e plana a tha a seo a' cur taic gu sònraichte ri Uibhist a Deas, a' gabhail a-steach shoithichean agus bun-structar.

"Agus bidh a' mhaoin-airgid ghnothachasan gu deimhinn a' cumail taic ri Uibhist a Deas, ach bidh e cuideachd ag amas air taic a thoirt do choimhearsnachdan eile a tha air an aon sheòrsa buaidh fhulaing," thuirt i.

'S e luchd-gnothachais Uibhist a Deas a ghairm a' choinneamh ann an Dalabrog

Tha luchd-gnothachais ag ràdh gu bheil iad air a bhith a' fulang fad bhliadhnaichean de chall agus droch chliù ri linn fàiligeadh Riaghaltas na h-Alba goireasan còmhdhail ceart a chumail ris na h-eileanan.

Chan eil a' dol às an sin gu tìr-mòr an-dràsta ach bàta a bheir dìreach 45 luchd-siubhhail. Tha riochdairean bho 30 de na companaidhean as motha a tha a' cumail cosnaidh ri daoine an Uibhist aig a' choinneimh aig Cnoc Soilleir Dimàirt.

Tha tòrr ghnothachasan air a bhith ag innse mun bhuaidh a tha staing na seirbheis a' toirt orra.

Thuirt feadhainn a tha a' ruith thaighean-òsta gu bheil iad a' call-a-mach aig a' mhionaid mu dheireadh ri linn daoine a tha a' cur nan tursan aca dheth anmoch.

Tha riochdairean bho gnothachasan èisg air a ràdh gum feum iad a dhol tro aiseag Bharraigh, agus tha cuid eile ag ràdh nach urrainn dhaibh a dhol gu tìr-mòr idir leis cho fada 's a tha na h-aiseagan a tha a' dol an-dràsta a' toirt.

Thuirt companaidhean eile nach urrainn dhaibh daoine fhastadh leis a' mhì-chinnt a th' ann, le aon riochdaire bho thaigh-staile ann an Uibhist ag ràdh gu bheil an sluagh air earbsa a chall.

Dh'innis Riaghaltas na h-Alba gu bheil iad a' cur £4.4m ri a bhith a' cur taic riuthasan a tha a' fulang ri linn suidheachadh nan aiseagan.

Chaidh moladh a chur air adhart aig a' choinneimh cuideachd gur e muinntir nan eilean a bu chòir a bhith air bòrd-stiùiridh ChalMac.

Thuirt CalMac gu bheil iad a' beachdachadh gu làidir air na h-uairean obrach air seirbheis Chaolas Bharraigh a leudachadh tràth sa mhadainn agus nas anmoiche feasgar airson barrachd chomasan a thoirt do sheirbheisean a-mach is a-steach a Bhàgh a' Chaisteil.