Piseach air seirbheis Taigh Shìophoirt a rèir luchd-sgrùdaidh

Taigh ShìophoirtCOMHAIRLE NAN EILEAN SIAR

Fhuair aithisg Buidheann Sgrùdaidh a' Chùraim gu bheil an t-seirbheis ann an Dachaigh-Cùraim Taigh Shìophoirt ann an Steòrnabhagh "math" neo "glè mhath" ann an còig roinnean.

Thuirt an luchd-sgrùdaidh gun robh piseach fhathast a dhìth air dà phàirt eile den t-seirbheis.

Nochd iad dragh mun t-seirbheis an toiseach san Iuchar an-uiridh agus bha dà aithisg bhon uair sin air laigsean a chomharrachadh fhathast.

Thill an luchd-sgrùdaidh gun innse ro làimh aig toiseach an Ògmhios am-bliadhna.

Cho-dhùin an aithisg aca gun robh an togalach fhèin agus an àrainneachd "glè mhath" agus mheas iad gun robh ceannas, luchd-obrach agus planadh na seirbheis "math" agus mar an ceudna an cùram a bha an luchd-còmhnaidh a' faighinn.

Bha iad "air an deagh choimhead às an dèidh", thuirt an aithisg, agus bha luchd-obrach a' dèiligeadh riutha le "coibhneas, co-fhaireachdainn agus spèis".

Fhuair an luchd-sgrùdaidh gun tàinig "piseach mòr" air mar a tha cungaidhean-leigheis cunbhalach gan toirt seachad agus gun robh daoine a' faighinn "nan drugaichean ceart aig an àm cheart''.

"Coibhneas, co-fhaireachdainn agus spèis"

Bha dà roinn far a bheil leasachadh a dhìth a rèir aithisg na Buidhne Sgrùdaidh.

Feumar pròtacal nas fheàrr nuair a gheibh neach-còmhnaidh cungaidh-leighis nach bi iad a' faighinn gu h-àbhaisteach gus am bi e "soilleir nuair a bhios sin a dhìth, dè thathar a' sùileachadh, buaidh an druga, agus na h-ath cheumannan mura bi e èifeachdach".

Tha leasachadh cuideachd a dhìth ann am planadh a' chùraim agus ath-sgrùdaidhean air an obair a bu chòir, tha an aithisg ag ràdh, a bhith "air an leasachadh le daoine aig an cridhe".

Tha Comhairle nan Eilean Siar ag ràdh gu bheil "aithisg an luchd-cùraim a' dearbhadh gun tàinig piseach mòr air seirbheis Taigh Shìophoirt".

Thuirt neach-labhairt: "Sheall na fhuair Buidheann Sgrùdaidh a' Chùraim gur e rùn nam manaidsearan agus an luchd-obrach san dachaigh an cùram as fheàrr a ghabhas a thoirt do gach neach a tha a' còmhnaidh ann."