Buinn òir a' Chomuinn a' dol a Ghlaschu is Obar Dheathain

'S iad Caitlyn Yule à Glaschu agus Finlay John Morse à Obar Dheathain a bhuannaich Farpais a' Bhuinn Òir aig Mòd Loch Abair.

Bha Caitlyn air a bhith sa chiad àite ann am farpais nam ban às dèidh na maidne is sin mar a chrìochnaich cùisean, ged a bha e glè fhaisg.

'S ann à Comar nan Allt a tha i bho thùs is i a-nise a' fuireach ann an Glaschu.

'S e Gur moch rinn mi dùsgadh òran ainmichte nam mnathan air an oidhche is 's e Am Bròn Mara a thagh Caitlin fhèin.

'S i Julie-Anne NicPhàidein às an Òban a bha san dàrna àite ann am farpais nam ban, dìreach pùing air cùl Caitlyn às dèidh a bhith trì air dheireadh sa mhadainn.

Cha robh ach dithis ann am farpais nam fear am-bliadhna, rud a tha an Comunn Gàidhealach air gealltainn a rannsachadh.

Bha Finlay John Morse air thoiseach air Jonathan Fairgrieve à Leòdhas às dèidh ro-fharpais na maidne agus sin mar a chrìochnaich gnothaichean air a' cheann thall air an oidhche cuideachd.

'S e Cuachag an Fhàsaich a chaidh a chur ro na fireannaich is thagh Finlay John fhèin Cumha Alasdair Dhuinn a ghabhail.

Tha e na stiùiriche air Còisir Ghàidhlig Obar Dheathain agus na bhall de Chòisir Ghàidhlig nan Loch agus de Bhùrach.

Bha na comharran ann am farpais nam ban mar a leanas:

• Caitlyn Yule - 738

• Julie-Anne NicPhàidein - 737

• Laura Robasdan - 732

• Amanda Millen - 725

Seo mar a bha na comharran ann am farpais nam fear:

• Finlay John Morse - 744

• Jonathan Fairgrieve - 721