Taighean ùra an t-Òib air an toirt seachad

Chaidh còig taighean ùra san t-Òb a chur ann an làmhan Buidheann Taigheadais Innse Gall (HHP) gu h-oifigeil is iad a-nise dèiseil airson daoine a bhith a' gluasad a-steach.

Rinn a' choimhearsnachd strì mhòr gus na taighean fhaighinn.

Bha mì-thoileachas mòr ann nuair a thàinig e am follais bho thùs nach rachadh ach sia taighean a thogail.

Às dèidh iomairt am measg an t-sluaigh chaidh aontachadh gum biodh 12 dachaigh ùr ann.

Dh'fhàg sin muinntir an t-Òib a' dèanamh gàirdeachais is iad ag ràdh gun robh cruaidh fheum air barrachd thaighean sa bhaile.

Tha còig taighean a-nise deiseil is dùil gum bi teaghlaichean a' gluasad a-steach an ceann ùine.

Tha seachd taighean eile fhathast ri thighinn is dùil gum bi iad sin deiseil san Dàmhair.

'S e a' chompanaidh Alex Murray Construction a tha a' dèanamh na h-obrach.

Thuirt Donnie Dòmhnallach, às leth Comhairle Coimhearsneachd Cheann a Deas na Hearadh, gun robh e a' cur fàilte mhòr air na còig taighean agus gu bheil iad a' coimhead air adhart gu mòr ris an seachd eile a bhith deiseil ann an ùine nach bi ro fhada.

Thuirt Pòl MacIllinnein, Ministear an Taigheadais aig Riaghaltas na h-Alba, buidheann a chuir maoineachadh a-steach don phròiseact seo, gun robh iadsan a' dèanamh gàirdeachais cuideachd mun chùis.

Thuirt e gu bheil e an dùil gum bi na taighean seo mar phàirt de dh'oidhirp gus spionnadh a chur sa choimhearsneach agus a bhith a' cumail taic ri gnothachasan agus seirbheisean anns an sgìre.