Dìth dhaoine airson bàta-teasairginn an t-Òib a chumail a' dol

Chan eil fhios dè dh'fhaodadh a bhith an dàn do sheirbheis an RNLI an ceann a deas na Hearadh leis nach eil daoine gu leòr ann a chumas am bàta-teasairginn a' dol.

Tha 13 bliadhna on thòisich an t-seirbheis san t-Òb. Bha seachdnar de chriutha a dhìth aig na ciad dà shoitheach a bh' aca agus cha robh gu leòr ann aig amannan.

Thòisich deuchainn ann an 2021 le soitheach nach fheum ach triùir airson a dhol gu muir.

A dh'aindeoin sin tha manaidsearan na seirbheis ag ràdh gu bheil dìth chriutha a' fàgail nach teid aca air seirbheis a là 's a dh'oidhche fad na bliadhna a thoirt seachad tuilleadh.

Thuirt iad gur ann le "aithreachas mòr" a tha iad a' tarraing a-mach às an deuchainn "aig deireadh seusan an t-samhraidh 2025".

Tha Ceannard Sgìreil an RNLI, Jill Hepburn, ag ràdh gur e "briseadh-dùil uabhasach a th' ann an dèidh na h-iomairt a rinn an criutha san t-Òb gus an soirbhicheadh leis an deuchainn seo".

Thuirt i: "Tha sinn air leth taingeil dhan choimhearsnachd airson gach taice a thug iad.

"Bidh sinn a-nise a' bruidhinn ris na buidhnean teasairginn agus cobhair uile a tha ag obair còmhla rinn mus dèan sinn co-dhùnadh mu na tha an dàn do Stèisean Bàta-Teasairginn an t-Òib."

Tha mar a tha sluagh na sgìre air crìonadh agus na tha a' fuireach ann air fàs nas sine gu mòr air cùlaibh na thachair, a rèir Manaidsear Stèisean Bhàta-teasairginn an t-Òib, Catriona Nic'illInnein.

"Tha cùisean nar n-aghaidh ann an ceann a deas na Hearadh gu mòr, gu mòr, gu mòr," thuirt i.

"Tha an àireamh-sluaigh a tha suas ann am bliadhnaichean gu math àrd an seo, agus an àireamh de dh'òigridh gu math ìosal.

"Chan e sin rud a tha a' dol a dh'atharrachadh am beul na h-oidhche.

"Feumaidh rudan mòra susbainteach tachairt anns a' choimhearsnachd a tha seo thairis air bliadhnaichean airson atharrachadh a thoirt air an t-suidheachadh sin," thuirt i.

Chan eil criutha gu leòr ann airson am bàta-teasairginn a chumail a' dol mar a bha

On thòisich an deuchainn tha iad air dèiligeadh ri 23 iarrtas taice agus cobhair.

Chaidh Stèisean Bàta-Teasairginn an t-Òib a stèidheachadh ann an 2012 an dèidh iomairt a rinn a' choimhearsnachd airson bàta-teasairginn fhaighinn

Cha bheag na dùbhlain a th' air a bhith aca on uair sin. Eadar buaidh Chovid agus gainnead shaor-thoileach bha iad trì bliadhna nan tàmh.

A-rithist rinn an sluagh iomairt mhòr airson an t-seirbheis a ghlèidheadh agus thòisich i às ùr ann an 2021 le bàta nas lugha, an Atlantic 85.

Tha a' bhuidheann-stiùiridh ag ràdh nach eil an dàrna leth de chriutha agus luchd-taice aca an-dràsta an taca ris na bh' aca roimhe agus gu bheil sin a' ciallachadh nach eil an t-seirbheis seasmhach.

Thuirt iad gun tuig iad gur e naidheachd thàmailteach a bhios ann don a h-uile duine a thug taic dhan stèisean.

Tha iad air leth taingeil, thuirt iad, do mhuinntir na Hearadh, Bheàrnaraigh agus Uibhist a Tuath a chuidich ann a bhith a' togail airgid don t-seirbheis.