Beachdan gan sireadh air Bile nan Cànanan Albannach

Tha beachdan gan sireadh air Bile nan Cànanan Albannach mar phàirt de sgrùdadh aig tè de chomataidhean Holyrood air a' bhile.

Chaidh am bile fhoillseachadh le Riaghaltas na h-Alba aig deireadh na Samhna.

Am measg eile, tha e a' gealltainn inbhe oifigeil dhan Ghàidhlig agus Albais agus foghlam Gàidhlig a neartachadh.

Bheireadh e cothrom cuideachd do chomhairlean ionadail sgìrean sònraichte ainmeachadh far am faodadh a' Ghàidhlig tuilleadh taic fhaighinn, ged a thog draghan mar-thà nach eil mìneachadh gu leòr ann air dè dìreach a bhiodh sin a' ciallachadh.

A-nise tha Comataidh an Fhoghlaim, na Cloinne is nan Daoine Òga ann am Pàrlamaid na h-Alba air an sgrùdadh acasan air a' bhile a thòiseachadh.

• Bile nan Cànanan Albannach air fhoillseachadh

• Bile nan Cànanan Albannach: "Taic a dhìth"

• Ceistean mu Bhile nan Cànanan Albannach

Mar phàirt den sin, tha iad a' sireadh bheachdan bhon phoball air a' bhile.

Tha a' cho-chomhairle a-nise fosgailte is dùinidh e air an 8mh là den Mhàrt.

Thuirt tè-ghairm na comataidh, Sue Webber BPA, gun toir am bile buaidh air coimhearsnachdan air feadh na dùthcha.

Thuirt i gu bheil a' chomataidh gu mòr airson cluinntinn bhon phoball, buidhnean poblach, is buidhnean eile.

Faodar beachd a thoirt seachad an seo agus an seo.