Tòrradh a' Phàpa gu bhith ann Disathairne

Sgaoil am Bhatacan dealbhan den Phàpa na chiste

Dhearbh a' Bhatacan gum bi tòrradh a' Phàpa Prainnseas ann Disathairne.

Chaochail am Pàpa madainn Diluain na Càisge às dèidh dha stròc agus fàiligeadh cridhe fhulang.

Bha e 88.

Tha Caitligich air feadh an t-saoghail air a bhith a' dèanamh luaidh air.

Ann am brath madainn Dimàirt, thuirt a' Bhatacan gun tèid corp a' Phàpa a thoirt gu Bàislig an Naoimh Peadar madainn Diciadain aig 10:00m àm ionadail (09:00 BST).

Càirdinealan am measg an t-sluaigh ann an Ceàrnag an Naoimh Peadar Dimàirt

Bidh a' chiste an sin gu là an tòrraidh is cothrom aig an t-sluagh urram a shealltainn.

Tòisichidh an tòrradh fhèin aig 10:00m àm ionadail Disathairne (09:00m).

Bidh an t-seirbheis a-muigh air beulaibh Bàislig an Naoimh Peadar agus 's e deadhan Colaiste nan Càirdinealan, Giovanni Battista Re, a bhios os a cionn.

Às dèidh na seirbheis, thèid corp a' Phàpa a thoirt gu Basilica di Santa Maria Maggiore.

'S e Prainnseas a' chiad Phàpa ann an còrr is 100 bliadhna a bhios air a thiodhlacadh taobh a-muigh na Bhatacain.

Bha e fhèin air ròghnachadh gun robh e 'son a bhith air a thiodhlacadh ann am Basilica di Santa Maria Maggiore.

Bha Pàpa Prainnseas cuideachd bho chionn ghoirid air cead a thoirt do phlanaichean gus pròiseas an tòrraidh a dhèanamh nas sìmplidh.

Tha seirbheisean ann air feadh an t-saoghail gus luaidh a dhèanamh air a' Phàpa.