Cùmhnant ga thoirt seachad airson seach-rathad Phort Rìgh

Chaidh cùmhnant £1.9m airson obair air seach-rathad Phort Rìgh anns an Eilean Sgitheanach a thoirt do Strath Civil Engineering Ltd.

Tòisichidh an obair air a' phìos mu dheireadh den rathad mu thimcheall air a' bhaile ann an 2026 agus thàinig maoineachadh o Riaghaltas na h-Alba agus o Chomhairle na Gàidhealtachd.

Chaidh innse bho chionn ghoirid gun robh Riaghaltas na h-Alba a' toirt iasaid seachad gus pàirt den chosgais de £1.6m airson na h-obrach sa chiad dol-a-mach a choinneachadh.

Thathar a' sùileachadh gum bi an rathad ùr deiseil ro àm an fhoghair 2026.

Tha an obair airson seachd-rathad air a bhith na phàirt de phlana leasachaidh na sgìre o 2019.

Bidh an rathad a ceangal leasachadh aig Home Farm agus an A87 (Rathad Dhun Bheagain) leis an A855 (Rathad Stafainn).

Cha bhi meadhan a' bhaile cho trang le trafaig nuair a bhios an A87 agus an A855 ceangailte.

Thuirt cathraiche Comataidh an Eilean Sgitheanaich agus Ratharsair, an comh Iain MacFhionnlaigh gur e rud uabhasach math a bh' ann gun deach an cùmhnant a thoirt seachad agus gun robh e dòchasach, mu dheireadh thall, gun deadh an obair a dhèanamh.

Thuirt an iar-chathraiche, an comh Drew Millar: "Tha mi air feitheamh 30 bliadhna airson a' phròiseict sa fhaicinn a' tighinn gu buil agus tha mi air mo dhòigh glan an cùmhnant seo fhaicinn ga thoirt seachad."