Trydaneiddio'n 'allweddol' i gynllun 'metro' de Cymru

Mae Cynghrair Trafnidiaeth De-ddwyrain Cymru yn dweud bod trydaneiddio'r rhwydwaith yn allweddol

Mae cynlluniau ar gyfer system reilffordd 'metro' fydd yn cwmpasu ardaloedd 10 cyngor gwahanol wedi cael eu hamlinellu yn ystod cyfarfod grŵp cludiant.

Ond mae Cynghrair Trafnidiaeth De-ddwyrain Cymru yn dweud bod trydaneiddio'r rhwydwaith yn allweddol i'r cynlluniau.

Datgelwyd y cynlluniau ddiwrnod wedi i Ysgrifennydd Drafnidiaeth y DU, Justine Greening, ddweud bod yna "achos da" dros ystyried trydaneiddio llinellau'r cymoedd.

Yr wythnos hon bu dirprwyaeth drawsbleidiol o ACau ac arweinwyr busnes yn lobïo San Steffan ar y mater.

Cafodd yr awgrymiadau ar gyfer system drafnidiaeth ar gyfer de ddwyrain Cymru eu datgelu yn ystod cyfarfod Cynghrair Trafnidiaeth De-ddwyrain Cymru ym Mhenybont-ar-Ogwr.

45 munud

Mae'r cynlluniau yn rhagweld teithwyr yn medru teithio dros ardaloedd 10 cyngor, o Sir Fynwy i Fro Morgannwg, mewn 45 munud o naill ai Caerdydd neu Gasnewydd.

Dywedodd y grwpiau cludiant y byddai'r cynlluniau yn darparu "rhwydwaith drafnidiaeth gynhwysfawr a chynialadwy i gwrdd â gofynion y 21ain Ganrif".

Mae Ms Greening wedi wynebu nifer o alwadau gan wleidyddion Cymru i ystyried ychwanegu llinellau'r cymoedd i'r cynllun £1 biliwn i drydaneiddio y brif linell rheilffordd rhwng Llundain a Chaerdydd a gyhoeddwyd blwyddyn yn ôl.

Mis diwethaf dywedodd Carl Sargeant, Gweinidog Trafnidiaeth Cymru, bod trydaneiddio llinellau'r Cymoedd a'r llinell Great Western i Abertawe yn "hanfodol".