'Na' i gau llyfrgelloedd yn ardal Wrecsam

Mae pwyllgor craffu Cyngor Wrecsam wedi gwrthod yr egwyddor o gau llyfrgelloedd, wrth drafod adroddiad ar y gwasanaeth llyfrgelloedd ddydd Mercher.

Mae pryderon y gallai tri o lyfrgelloedd gael eu cau yn y dyfodol wrth i'r Cyngor geisio gwneud arbedion ariannol.

Gallai llyfrgelloedd Brymbo a Gresffordd gael eu cau, ynghyd ag un o dair llyfrgell arall sydd wedi eu lleoli yng Nghefn Mawr, Rhosllannerchrugog a Rhiwabon.

Ond bydd pwyllgor craffu'r cyngor nawr yn cyflwyno argymhelliad ar gyfer bwrdd gweithredol y cyngor fydd yn cwrdd ym mis Mawrth i beidio â chau llyfrgelloedd oni bai bod cyfleusterau amgen ar gael mewn adeiladau gerllaw.

Mae enwau yn cael eu casglu ar ddeisebau yn ardal i wrthwynebu unrhyw fwriad i gau llyfrgelloedd yn y cylch.