Les Misérables: Criw yr Urdd yn perfformio yn y West End
- Cyhoeddwyd
Fe gafodd criw Theatr Ieuenctid yr Urdd gyfle i berfformio'r sioe ar lwyfan Theatr y Frenhines yn Soho
Mae criw Theatr Ieuenctid Yr Urdd wedi ymuno â chast sioe Les Misérables ar lwyfan y West End yn Llundain.
Bu rhai o'r cast yn siarad yn egscliwsif gyda Cymru Fyw ar eu ffordd i'r achlysur arbennig i nodi pen-blwydd y sioe gerdd enwog yn 30 oed.
Roedd y fersiwn Gymreig o'r sioe gan ysgolion rhwng Canolfan Mileniwm Cymru a Theatr Ieuenctid Genedlaethol yr Urdd yn nodi 10 mlynedd ers agor canolfan Gwersyll yr Urdd Bae Caerdydd.
Fe gafodd y criw eu gwahodd i berfformio yn Llundain wedi i gynhyrchydd y sioe yn Llundain, Cameron Mackintosh, fynd i ymarferion cynhyrchiad yr Urdd yn ystod yr haf.
Yn ystod y perfformiad yn Llundain nos Iau fe ymunodd 130 o aelodau'r Urdd â'r perfformwyr gwreiddiol ar lwyfan Theatr y Frenhines.
Bydd y sioe ar 29, 30 a 31 Hydref yng Nghanolfan Mileniwm Cymru
Ymysg y sêr ar y llwyfan roedd pump o'r rhai sydd wedi chwarae rhan Jean Valjean yn y cynhyrchiad o'r blaen, gan gynnwys y Cymro John Owen Jones.
Dywedodd Siân Eirian, cyfarwyddwr y prosiect: "Roedden ni wedi cyffroi o glywed fod Cameron yn bwriadu ymweld â'r ymarferion ac yn ffyddiog y byddai'n cael ei blesio gan y cast o 130.
"Roedd cannoedd o bobl ifanc wedi ymgeisio am rannau yn y sioe ond dim ond 130 o'r perfformwyr gorau gafodd eu dewis.
"Roedd yn rhaid i ni gadw'r perfformiad yn Llundain yn gyfrinach gan mai ni oedd y gwestai arbennig ar gyfer y noson - roedd yn dipyn o dasg gan fod cynifer o'r bobl ifanc wedi cyffroi."
Cefin Roberts, cyd-sylfaenydd Cor Glanaethwy, yw cyfarwyddwr sioe ysgolion Les Misérables.
Un oedd yn y perfformiad i ddathlu 20 mlynedd Les Mis, a hynny ddegawd yn ôl, yw Rhidian Marc o Gaerdydd.
Roedd yn aelod o gast sioe Theatr Ieuenctid yr Urdd bryd hynny a chafodd criw dethol o'r sioe fynd i'r West End i berfformio ar gyfer y dathliad bryd hynny.
Mae Rhidian wedi perfformio yn nhaith y sioe broffesiynol o amgylch Prydain, wedi serennu yn fersiwn ffilm o'r sioe gyda rhai o sêr mwya'r sgrin fawr fel Hugh Jackman, Russell Crowe ac Anne Hathaway, a chwarae rhan Enjolras yn y sioe lwyfan wreiddiol yn Llundain.
Rhidian Marc ym mherfformiad yr Urdd 10 mlynedd yn ôl ac ar lwyfan y sioe yn fwy diweddar
Dywedodd wrth BBC Cymru Fyw fod y ffaith ei fod wedi cael y cyfle i berfformio ar lwyfan y West End 10 mlynedd yn ôl wedi bod yn "allweddol" wrth geisio gyrfa ar y llwyfan.
"Roedd e'n brofiad anhygoel i fachgen 17 oed, cael camu ar lwyfan mawr fel hyn am y tro cynta gyda gwisgoedd, set a goleuadau go iawn.
"Roedd y ffaith ein bod wedi cael y cyfle yn golygu mod i'n gwneud contacts yn y maes.
"Ar ôl graddio o'r Central School of Speech and Drama fe ges i gyfweliad i ymuno ag ensemble y sioe oedd yn mynd ar daith a, heb os, y profiad yma oedd wedi agor y drws i mi.
"Roedd yn wirioneddol yn gyfle gwych i rywun oedd â'i fryd ar yrfa ym myd y theatr."
Bydd y sioe ysgolion ar 29, 30 a 31 Hydref yng Nghanolfan Mileniwm Cymru.