Twneli Brynglas ar frig tabl tagfeydd ffyrdd Cymru
- Cyhoeddwyd
Twneli Brynglas ger Casnewydd yw'r man gwaethaf yng Nghymru ar gyfer tagfeydd
Cafodd 30,500 o dagfeydd eu cofnodi ar ffyrdd Cymru yn 2017, yn ôl ffigyrau swyddogol.
Y dagfa waethaf oedd un saith awr a 10 milltir o hyd ar yr M4 ar 27 Hydref.
Y man gwaethaf ar gyfer tagfeydd yw twneli Brynglas i gyfeiriad y gorllewin ar yr M4 ger Casnewydd, gyda chyfartaledd o fwy nag un dagfa bob diwrnod.
Yn ôl cwmni Inrix sy'n dadansoddi ffigyrau am hewlydd Cymru mae'r tagfeydd yn nhwneli Bryn-glas yn golygu cost o £14m i yrwyr, o ran yr amser sy'n cael ei golli.
Mae Inrix hefyd yn amcangyfrif fod tagfeydd wedi golygu cost o £278n i economi Cymru yn 2017
Dywedodd Dr Graham Cookson, prif economegydd Inrix: "Mae sawl peth yn gallu achosi tagfeydd, ond mae data Inrix yn dangos mai damweiniau yw'r ffactor mwyaf niferus."
Yn ôl Inrix roedd yna 84 o dagfeydd bob diwrnod ar gyfartaledd ffyrdd Cymru yn 2017.
Y tri lle gwaethaf oedd twneli Bryn-glas, cyffordd 43 o'r M4 rhwng Dwyrain Abertawe a Chastell-nedd, a chyffordd 41 o'r M4 ger Port Talbot.
Byddai'r draffordd yn cael ei hadeiladu dros ddociau Casnewydd dan gynllun y llywodraeth
Mae llywodraeth Cymru am godi traffordd chwe lôn i'r de o Gasnewydd mewn ymdrech i liniaru problemau twneli Brynglas.
Ond yr wythnos diwethaf daeth i'r amlwg fod yna oedi pellach o ddwy flynedd yn y cynllun tra bod y gost wedi cynyddu i £1.3bn.
Y lleoliad gwaethaf o ran tagfeydd yn y gogledd yw'r A55 yn ardal Ewlo ar Lannau Dyfrdwy.
Yno, mae cynlluniau ar y gweill i godi ffordd osgoi newydd i'r ardal ar gost o £250m.