'Cryfhau' cysylltiadau rhwng Cymru ac Iwerddon wedi Brexit

Roedd Mark Drakeford ar banel cynhadledd economaidd yn Iwerddon ddydd Sadwrn

Bydd Cymru'n cryfhau ei chysylltiadau gyda Gweriniaeth Iwerddon yn dilyn Brexit, medd Ysgrifennydd Cyllid Cymru.

Mae Mark Drakeford, ynghyd ag arweinydd y DUP Arlene Foster, ac arweinydd Fianna Fáil, Micheál Martin wedi teithio i Killarney i fod ar banel mewn cynhadledd economaidd yno.

Dywedodd Mr Drakeford fod gweinidogion Cymru'n "ymrwymiedig i ddyfnhau'r cysylltiadiadau" ag Iwerddon y tu allan i'r Undeb Ewropeaidd.

Dywedodd bod yn rhaid cynnal y partneriaethau "gwych a chreadigol".

Roedd y panel yn ystyried effaith gadael yr UE ar fusnes, gwleidyddiaeth, y gyfraith a bywydau pobl yn gyffredinol.

'Trysori'n perthynas'

Tra'n siarad cyn y gyhadledd, dywedodd Mr Drakeford: "Rydym yn trysori'n perthynas gydag Iwerddon ac yn ymrwymiedig i ddyfnhau'n cysylltiadau y tu allan i'r Undeb Ewropeaidd, o ystyried y cysylltiad agos, y gwerthoedd rydym yn eu rhannu a'r cysylltiadau diwylliannol rhwng y ddwy genedl."

"Fel cenedl eangfrydig, rydym eisiau cynnal ac adeiladu ar rwydweithiau rhyngwladol trwy gymryd rhan mewn rhaglenni ar y cyd.

"Rydym yn rhoi gwerth mawr ar Rhaglenni Cydweithredu Tiriogaethol Ewropeaidd (ETC), gan gynnwys ein rhaglenni trawsffiniol gyda'n cymdogion agosaf."

Ychwanegodd fod cynlluniau o'r fath yn cynnig ffyrdd o ddarganfod datrysiadau i heriau sy'n gyffredin rhwng y gwledydd.