Morfudd Hughes sy'n Ateb y Galw yr wythnos yma
- Cyhoeddwyd
Yr actores Morfudd Hughes sy'n Ateb y Galw yr wythnos hon, wedi iddi gael ei henwebu gan Tweli Griffiths wythnos diwetha'.
Beth ydi dy atgof cyntaf?
Un o fy atgofion cynharaf, os nad y cyntaf un, ydi cael fy neffro yn ystod oriau mân y bora i fynd ar daith yn y car hefo fy mam a nhad a'm mrawd i Stoke-on-Trent!
Pwy oeddet ti'n ei ffansio pan yn iau?
Ynghyd â David Essex, ro'n i'n ffansio hogyn o'r enw Derwyn. Ro'dd o'n ffrind i'm mrawd ac yn goblyn o bêl-droediwr da.
Beth oedd y digwyddiad a gododd y mwya' o gywilydd arnat ti erioed?
Dwi'n cofio pan o'n i'n fach, dwyn bisgedan Jacob's Club oren o siop y pentra' - a chal copsan gin mam. Mam wedyn yn deud wrth Mr Parry'r perchennog. Nesh i mohono fo eto!
Pryd oedd y tro diwethaf i ti grïo?
Llynedd, gryn dipyn. Mi wnes i golli llawer o anwyliaid.
Oes gen ti unrhyw arferion drwg?
Dwi braidd yn funud ola' hefo gwaith papur ac ati, yn enwedig cael trefn ar fy nghyfrifon.
Mae 'na lawer o lefydd hyfryd ar hyd arfordir Ynys Môn
Dy hoff le yng Nghymru a pham?
Mi fues i yn crwydro arfordir Môn llynedd. Mai'n anodd dewis fy hoff ran ohoni gan fod bob un yn gwbl odidog, waeth be' fo'r tywydd.
Y noson orau i ti ei chael erioed?
Fel mae'n digwydd, dydi hi ddim yn noson fyddwn i'n dymuno rhannu gormod amdani hefo neb arall. Llydaw y llynedd, mewn caban pren tlws, fry uwchben mewn coedwig anghysbell. Roedd o'n rhan o aduniad ar ôl dros 30 o flynyddoedd o fod ar wahân, hefo nghariad. Dwi 'di deud lot gormod rŵan!
O Archif Ateb y Galw:
Disgrifia dy hun mewn tri gair
'Nai adal hynny i bobol erill.
Beth yw dy hoff lyfr neu ffilm?
Ma' gin i sawl hoff ffilm ar fy rhestr sy'n newid yn achlysurol, ac mae Stand by me wastad arni.
Byw neu farw, gyda phwy fyddet ti'n cael diod. Pam?
Elvis, gan obeithio y bydda fo'n canu Love me tender cyn ddiwadd y noson.
Siŵr gallai Morfudd ddwyn perswâd ar Elvis i ganu iddi!
Dyweda rywbeth amdanat ti dy hun nad oes yna lawer o bobl yn ei wybod
Mi ges i f'arestio ar un o brif strydoedd Moscow ym mis Mai 1992.
Ar dy ddiwrnod olaf ar y blaned, beth fyddet ti'n ei wneud?
Nôl yn y caban coed hwnnw nes i siarad amdano'n gynharach... hefo'r un person wrth gwrs.
Beth yw dy hoff gân a pham?
Dŵr gan Huw Jones. Atgofion hyfryd o deithio yn y car hefo fy mab Llion pan oedd o'n fengach. Ein ffefryn oedd hwnnw. Y ddau ohona ni'n morio canu a phob yn ail cael cogio bach bod yn Huw a Heather! Ooooo gwych!
Cwrs cyntaf, prif gwrs a phwdin - beth fyddai'r dewis?
Rwbath go syml i ddechra, olifau neu gaws gafr. Pysgodyn fel prif gwrs ac yna darn o unrhyw un o bwdinau anfarwol fy chwaer-yng-nghyfraith.
Fydd Morfudd yn cael bod Y Dalai Lama ar ôl cael ei harestio ym Moscow?!
Petaset yn gallu bod yn rhywun arall am ddiwrnod, pwy fyddai fo/hi?
Tenzin Gyatso, Y Dalai Lama.
Pwy sydd yn Ateb y Galw wythnos nesaf?
Bryn Fôn