'Hyd at £30,000 i athrawon dan hyfforddiant os fydd Plaid Cymru mewn grym'

Dywed Plaid Cymru y byddai'n cynnig "cymhellion teg a chystadleuol i ddenu a chadw athrawon" yng Nghymru

Mae Plaid Cymru'n dweud y byddai'n cynnig hyd at £30,000 i athrawon newydd os taw nhw sy'n ennill etholiad nesaf y Senedd.

Yng nghynhadledd flynyddoedd y blaid yn Abertawe, mae disgwyl i'w llefarydd addysg Cefin Campbell ddweud y byddai llywodraeth dan arweiniad Plaid Cymru yn cynnig "cymhellion teg a chystadleuol i ddenu a chadw athrawon" yng Nghymru.

Dywed y blaid y byddai'n anelu at gynnig taliadau cyfatebol i rai Lloegr erbyn diwedd tymor y Senedd nesaf, a fydd yn dod i ben yn 2030, gan ganolbwyntio ar bynciau blaenoriaeth.

Fe fydd etholwyr yn pleidleisio ym mis Mai i ddewis eu cynrychiolwyr yn y Senedd newydd ehangach, gyda 90 o aelodau yn lle'r 60 presennol.

Yn ei araith fe fydd Mr Campbell, Aelod o'r Senedd yn rhanbarth Canolbarth a Gorllewin Cymru, hefyd yn amlinellu cynllun y blaid i godi safonau.

Mae hwnnw'n cynnwys cynllun llythrennedd a rhifedd sy'n "gosod meincnodau cenedlaethol" a llyfrgell ymhob ysgol gynradd.

Mae'r blaid yn dweud y bydd yn mynd ati i gau'r bwlch gyda Lloegr yn raddol "i sicrhau nad yw athrawon dan hyfforddiant yng Nghymru dan anfantais ariannol am ddewis astudio a gweithio yma".

Y bwriad yw cynnig taliadau hyd at £30,000 yn achos pynciau blaenoriaeth yn ystod cyfnod hyfforddi cychwynnol athrawon, a fydd, medd y blaid, yn codi'n raddol er mwyn cyfateb â'r hyn sy'n cael ei gynnig dros y ffin.

Fe fydd yr arian yn cael ei roi ar y sail bod y sawl sy'n ei dderbyn yn gweithio yng Nghymru am bum mlynedd ar ôl darfod eu cyfnod prawf.

Mae gan Blaid Cymru gynllun, medd Cefin Campbell, i gadw athrawon yng Nghymru ac i sicrhau bod disgyblion yn cyrraedd eu potensial llawn

Bydd Mr Campbell yn dweud wrth y gynhadledd: "Mae methiant Llafur i gael hyd yn oed y pethau sylfaenol yn iawn, mewn llythrennedd a rhifedd, yn golygu nad yw ein disgyblion yn cyflawni eu potensial.

"Ond mae gan Blaid Cymru gynllun. Byddwn yn sicrhau bod ein disgyblion yn dal i fyny ac yn cyrraedd eu potensial, a byddwn yn codi safonau addysgol ledled Cymru."

Mae disgwyl iddo rybuddio bod Cymru'n wynebu "argyfwng o ran recriwtio a chadw athrawon".

"Dyna pam rydw i'n falch o gyhoeddi y bydd llywodraeth Plaid Cymru yn buddsoddi yn nyfodol addysg Cymru trwy gynnig cymhellion teg a chystadleuol i ddenu a chadw'r athrawon y mae eu hangen ar ein hysgolion.

"Erbyn diwedd tymor nesaf y Senedd, bydd ein cynnig cymhelliant yn cyfateb i'r hyn sydd ar gael ar hyn o bryd yn Lloegr, gan sicrhau nad yw athrawon dan hyfforddiant yng Nghymru yn cael eu cosbi'n ariannol am ddewis astudio a gweithio yma."

Arweinydd y blaid, Rhun ap Iorwerth, yn annerch y gynhadledd ddydd Gwener

Ddydd Gwener yn ei araith yntau, fe apeliodd arweinydd y blaid, Rhun ap Iorwerth, ar etholwyr i gefnogi Plaid Cymru os ydyn nhw'n awyddus i atal Reform UK rhag dod i rym.

Dywedodd hefyd bod Plaid Cymru'n barod "i ddisodli" Llafur Cymru, gan roi addewid i gynnig gofal plant am ddim i rieni ar gyfer pob plentyn rhwng naw mis a phedair oed.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.