Gleision yn ystyried symud o Barc yr Arfau

Mae Parc yr Arfau yn cyffwrdd Stadiwm Principality yng Nghaerdydd

Mae tîm rygbi'r Gleision yn ystyried symud o'u cartref ym Mharc yr Arfau.

Methiant y rhanbarth i ddod i delerau ynglŷn â'r brydles sydd yn dod i ben yn 2022 gyda pherchnogion y tir, Clwb Athletau Caerdydd (CAC) sydd y tu ôl i'r penderfyniad.

Mewn datganiad mae'r clwb yn dweud: "Mae'r bwrdd wedi cytuno fod rhaid diogelu dyfodol y Gleision drwy edrych ar opsiynau y tu hwnt i Barc yr Arfau.

"Mae nifer o gyfleoedd cyffrous ar gael."

Mae'r Gleision wedi argymell cynlluniau i wneud gwerth miliynau o bunnoedd o welliannau i'r stadiwm, ond fe gafodd y cynlluniau eu gwrthod gan CAC yn 2017.

'Sicrhau dyfodol'

Ym mis Hydref dywedodd CAC ei bod nhw'n fodlon trafod les newydd er mwyn "sicrhau dyfodol" rygbi ar y maes.

Mae Caerdydd RFC, sy'n chwarae yn ail haen Uwch Gynghrair Cymru hefyd yn defnyddio Parc yr Arfau ar gyfer gemau cartref.

Fe wnaeth y Gleision symud i chwarae yn Stadiwm Dinas Caerdydd yn 2009.

Tri thymor yn ddiweddarach - ar ddiwedd tymor 2011-12 - fe benderfynodd y Gleision symud yn ôl i Barc yr Arfau.

Mae disgwyl i CAC gynnal eu cyfarfod blynyddol ar 7 Chwefror.