Chwe Gwlad: Pedwar yn holliach i Gymru i herio Iwerddon
- Cyhoeddwyd
Dydy Taulupe Faletau heb chwarae ers 9 Tachwedd oherwydd anaf i'w ben-glin
Fe fydd pedwar o brif chwaraewyr Cymru yn ffit i wynebu Iwerddon ddydd Sadwrn wedi iddyn nhw wella o anafiadau.
Dywedodd hyfforddwr blaenwyr Cymru, Robin McBryde, fod y chwaraewyr rheng ôl Ross Moriarty a Taulupe Faletau yn holliach ar gyfer yr ornest yn y Chwe Gwlad.
Bydd y cefnwr Leigh Halfpenny a'r maswr Dan Biggar hefyd ar gael ar gyfer y gêm, wedi anafiadau troed ac ysgwydd.
Fe fydd tîm Cymru i herio'r Gwyddelod yn cael ei enwi ddydd Mawrth, gyda Liam Williams hefyd yn gobeithio dychwelyd ar ôl profi'i ffitrwydd wrth chwarae dros Saracens.
Mae Cymru'n teithio i Ddulyn yn gobeithio taro nôl ar ôl colli i Loegr yn eu gêm ddiwethaf, a hynny wedi buddugoliaeth yng ngornest agoriadol y bencampwriaeth yn erbyn Yr Alban.