Dyn wedi'i anafu'n ddifrifol wedi gwrthdrawiad A470

Mae dyn lleol wedi ei anafu'n ddifrifol yn dilyn gwrthdrawiad ar ffordd yr A470 ger Dolgellau yn oriau mân bore Sul.

Dywedodd Heddlu Gogledd Cymru fod y dyn yn cerdded pan gafodd ei daro ger Brithdir am tua 06:30, a bod y cerbyd wedi gyrru i ffwrdd heb stopio.

Cafodd y dyn 24 oed ei gludo i Ysbyty Bronglais yn Aberystwyth ble mae'n cael ei drin ar gyfer anafiadau difrifol, ond dim rhai sy'n peryglu'i fywyd.

"Rydyn ni'n apelio ar y gyrrwr i gysylltu gyda ni cyn gynted â phosib," meddai'r Sarjant Anja Macleod o'r Uned Blismona Ffyrdd.

"Hefyd dylai unrhyw un allai fod wedi gweld y dyn yn cerdded ar hyd yr A470 rywbryd rhwng 03:00 a 06:30, neu allai fod wedi gweld y gwrthdrawiad i gysylltu gyda ni er mwyn helpu gyda'n hymchwiliad."