Gwaharddiad AC: Gwrthod apêl Michelle Brown o UKIP

Mae apêl un o ACau UKIP yn erbyn dyfarniad gan bwyllgor safonau'r Cynulliad y dylai hi gael ei gwahardd o'i gwaith yn ddi-dâl am wythnos, wedi'i wrthod.

Daeth aelodau'r pwyllgor i'r casgliad fod Michelle Brown wedi torri'r côd ymddygiad yn "ddifrifol", wedi iddi wneud sylw hiliol am AS Llafur.

Dywedodd y bargyfreithiwr Syr John Williams nad oedd Ms Brown wedi codi unrhyw ddadl fod y penderfyniad gwreiddiol yn ddiffygiol.

Disgwylir i'r mater gael ei gyflwyno gerbron Aelodau Cynulliad am benderfyniad terfynol ar 2 Mai.

Fe gafodd Ms Brown ei chyhuddo o ddisgrifio'r AS dros Streatham, Chuka Umunna, fel "cnau coco" - term sy'n cael ei ystyried yn ddilornus a hiliol - mewn galwad ffôn ym mis Mai 2016.

Fe ddefnyddiodd Michelle Brown iaith hiliol wrth siarad am Aelod Seneddol Llafur, Chuka Umunna

Roedd Ms Brown yn siarad ar y ffôn gydag uwch gynghorydd UKIP, Nigel Williams ar y pryd, mewn galwad gafodd ei recordio.

Fe gafodd y sgwrs ei chyhoeddi yn ddiweddarach gan bapur newydd y Daily Post.

Ym mis Chwefror, fe ddaeth BBC Cymru i ddeall fod y pwyllgor safonau wedi penderfynu y dylai Ms Brown wynebu gwahardd am wythnos.

• UKIP i drafod dyfodol Michelle Brown AC

• Argymell diarddel AC UKIP am wythnos

• ASE UKIP yn galw am ddiarddel Brown

Roedd ACau ar y pwyllgor, yn cynnwys Gareth Bennett o blaid UKIP, wedi dweud disgrifiad Ms Brown o Mr Umunna yn enghraifft o "gam-drin hiliol" a oedd yn "gwbl annerbyniol", yn dilyn ymchwiliad gan y comisiynydd safonau Syr Roderick Evans.

Mae Ms Brown eisoes wedi ymddiheuro am unrhyw niwed a achoswyd.