Cwpan Cymru: Aberystwyth 1-4 Cei Connah

Cei Connah sydd wedi cipio Cwpan JD Cymru 2018 a hynny wedi iddyn nhw drechu Aberystwyth o bedair gôl i un.

Cafodd y gêm ei chynnal ym Mharc Latham, Y Drenewydd.

Michael Bakare a sgoriodd y gôl gyntaf i Gei Connah ac y mae e wedi sgorio i'w dîm ym mhob rownd o'r Cwpan.

Yn fuan wedyn dyblwyd y fantais i Gei Connah wedi i Michael Wilde roi'r bêl drwy'r rhwyd ac ar ôl 39 munud fe sicrhaodd Michael Wilde gôl arall gan ddod â'r sgôr i 0-3.

Ond roedd yna rywfaint o achubiaeth i Aberystwyth cyn diwedd yr hanner cyntaf wedi i Ryan Wade sgorio ac felly y sgôr ar yr hanner oedd 1-3.

Bu bron i Aberystwyth sgorio eilwaith ond fe darodd cic Malcolm Melvin y trawst a doedd y bêl ddim dros y llinell.

Ar ddiwedd y gêm roedd yna gôl arall i Gei Connah gan Andy Owens a dyna sicrhau fuddugoliaeth ysgubol iddyn nhw.

Y sgôr ar ddiwedd y gêm felly oedd Aberystwyth 1, Cei Connah 4.

Ennill y Cwpan am y tro cyntaf

Roedd hi'n ddiwrnod hanesyddol i Gei Connah wrth iddyn nhw ennill Cwpan Cymru am y tro cyntaf erioed.

Fe ddenodd y gêm dorf o gefnogwyr - yn eu plith Elin Jones AC a Ben Lake AS ac hefyd roedd Jack Sargeant, aelod cynulliad Alyn a Dyfrdwy yn bresennol.

Elwyn Jones, Elin Jones AC a Ben Lake AS ar eu ffordd i'r gêm

Hwn oedd y pumed tro i'r Drenewydd gynnal y gêm.