Caerdydd yn sicrhau dyrchafiad i Uwch Gynghrair Lloegr
- Cyhoeddwyd
Mae Caerdydd wedi sicrhau eu lle yn Uwch Gynghrair Lloegr y tymor nesaf, wedi gêm gyfartal yn erbyn Reading.
Di-sgôr oedd hi ar y chwiban olaf yn Stadiwm Caerdydd, ond gan fod Fulham wedi colli o 3-1 yn erbyn Birmingham, mae'r Adar Gleision wedi gorffen y tymor yn ail safle'r Bencampwriaeth, gan sicrhau dyrchafiad otomatig.
Fe fydd Caerdydd yn wynebu cewri Uwch Gynghrair Lloegr y tymor nesaf felly, a hynny am y tro cyntaf ers 2014.
Caniatáu cynnwys Twitter?
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter, dolen allanol a pholisi preifatrwydd, dolen allanol cyn derbyn. Er mwyn gweld y cynnwys dewiswch ‘derbyn a pharhau’.
Roedd y stadiwm yn orlawn ar gyfer gêm ola'r tymor, gyda 32,478 o docynnau wedi eu gwerthu, ac roedd yna ymddangosiad prin gan berchennog y clwb, Vincent Tan.
Fe ddaeth sawl cyfle i Gaerdydd i fynd ar y blaen yn ystod y gêm, gydag ergydion gan Kenneth Zahore a Junior Hoilett, ond roedd amddiffyn cadarn Reading yn ormod.
Tra'n gwylio'r chwarae, roedd cefnogwyr yr Adar Gleision hefyd yn cadw llygad barcud ar y digwyddiadau ar gae St Andrew lle roedd Fulham yn gobeithio trechu Birmingham a disodli Caerdydd yn ail safle'r Bencampwriaeth.
Ond nid felly y bu hi, wrth i Birmingham sicrhau buddugoliaeth brin a chadw'i lle yn y Bencampwriaeth.
'Uchafbwynt fy ngyrfa'
Fe fydd llawer o'r diolch am berfformiad y tymor yn mynd i'r rheolwr Neil Warnock. Dyma'r wythfed dyrchafiad iddo ef ei sicrhau yn ei yrfa fel rheolwr.
Ers 2002, mae Caerdydd wedi methu â sicrhau dyrchafiad drwy'r gemau ail-gyfle bedair gwaith - tair o'r rheiny o fewn yr wyth mlynedd ddiwethaf.
Wedi'r gêm, dywedodd Warnock: "Dyma'r uchafbwynt i mi yn fy ngyrfa o 38 mlynedd."
"Mae gen i griw gwych o fechgyn. Rydyn ni wedi cyflawni camp enfawr, oherwydd doedd neb yn credu fod gyda ni gyfle.
"Mae'n anhygoel. Dwi wedi gweld ambell i ddyrchafiad a sgwad gwych, ond oherwydd yr amgylchiadau yr es i fewn iddyn nhw - yn ail o'r gwaelod - rydyn ni wedi adeiladu ar hynny yr holl ffordd.
"Dwi ddim yn cofio wythnos fel hon. Dydw i ddim wedi cysgu fwy na thair awr.
"Mae'n deimlad anhygoel i reolwr wybod mai chi ddaeth â phethau at ei gilydd."