BBC Cymru i dorri dwsinau o swyddi technoleg ac archifau

Bydd y swyddi'n cael eu torri cyn i'r timau adleoli o'r pencadlys presennol yn Llandaf

Mae BBC Cymru wedi cyhoeddi eu bwriad i dorri 83 o swyddi yn eu hadrannau technoleg, adnoddau ac archifau.

Daw'r cyhoeddiad am y toriadau cyn i'r darlledwr adleoli ei bencadlys o Landaf i Sgwâr Canolog Caerdydd.

Fel rhan o'r aildrefnu bydd 18 o swyddi newydd yn cael eu creu felly mae BBC Cymru'n dweud mai 65 yw'r nifer cyfan o swyddi fydd yn mynd.

Dywedodd y BBC bod angen cyflwyno'r newidiadau cyn symud gweithwyr i'r adeilad newydd, a bod ymgynghoriad wedi dechrau gyda staff ac undebau.

Mae disgwyl i'r newidiadau ddigwydd erbyn diwedd 2019 neu ddechrau 2020, wrth i'r timau adleoli i ganol y ddinas.

Staff S4C

Ymysg y rhai fydd yn cael eu heffeithio gan y newidiadau mae 35 o aelodau staff sydd yn gweithio yn S4C ar hyn o bryd, ond fydd yn mynd i weithio i'r BBC pan fydd y darlledwyr yn rhannu systemau yn yr adeilad newydd.

Ar hyn o bryd mae gan S4C ei thechnoleg ei hun i ddarlledu o'i phencadlys yn Llanisien, ond bydd staff y sianel yn dechrau symud i'w phencadlys newydd yng Nghaerfyrddin yn fuan.

Mae disgwyl i staff BBC Cymru ddechrau symud i'w pencadlys newydd o ddiwedd 2019

Fis Ebrill, fe gafodd y BBC yr allweddi i'w phencadlys newydd yn y Sgwâr Canolog, a'r adeilad fydd y cyntaf o'i fath ym Mhrydain i ddefnyddio technoleg newydd fydd yn cysylltu teclynnau ac offer trwy gyswllt internet protocol.

Tua £100m ydy buddsoddiad y BBC yn yr adeilad newydd, a bydd tai yn cael eu codi ar safle'r pencadlys presennol yn Llandaf.

Dywed BBC Cymru y bydd yr ad-drefnu'n symleiddio ffyrdd o weithio ac yn sicrhau arbedion i'r gorfforaeth ac i S4C.

Yn ôl Cyfarwyddwr BBC Cymru, Rhodri Talfan Davies mae'r "newidiadau arfaethedig, er eu bod yn hynod o anodd, yn hanfodol os ry'n ni am baratoi'r sefydliad ar gyfer symud".

"Gyda buddsoddiad mor fawr mewn systemau technoleg newydd - gan gynnwys archif ddigidol gyflawn - roedd newidiadau yn anochel," meddai.

"Ond dwi'n gwybod y bydd y cyhoeddiadau heddiw yn achosi cryn bryder, a byddwn yn gwneud popeth o fewn ein gallu i gefnogi cydweithwyr yn ystod y cyfnod hwn o newid."