Kinnock: Angen i Corbyn 'wneud mwy' ar wrth-Semitiaeth

Dywedodd Stephen Kinnock bod angen i Jeremy Corbyn "osod esiampl"

Mae angen i Jeremy Corbyn "osod esiampl" er mwyn atal argyfwng gwrth-Semitiaeth y Blaid Lafur, yn ôl un Aelod Seneddol o Gymru.

Dywedodd AS Aberafan, Stephen Kinnock, fod yn rhaid i arweinydd ei blaid wneud mwy nag ymddiheuro am ymddangos ar lwyfan gydag un o oroeswyr yr Holocost wnaeth gymharu Israel gyda Natsïaeth.

Daw sylwadau Mr Kinnock ar ôl iddo ddod i'r amlwg fod Mr Corbyn wedi mynychu cyfarfod yn 2010 ar y testun 'Camddefnydd o'r Holocost ar gyfer Dibenion Gwleidyddol'.

Dywedodd Mr Corbyn fod yna safbwyntiau gafodd eu mynegi nad oedd yn eu "derbyn nac yn eu cymeradwyo".

"Yn y gorffennol, mewn ymgais i sicrhau cyfiawnder i bobl Palestina a heddwch yn Israel/Palestina, rwyf ar adegau wedi ymddangos ar lwyfannau gyda phobl sydd â daliadau rwyf yn llwyr wrthwynebu," meddai Mr Corbyn.

"Rwy'n ymddiheuro am y pryder mae hyn wedi ei achosi."

Mae Jeremy Corbyn wedi dweud ei fod yn ymddiheruo am unrhyw bryder

Dywedodd Mr Kinnock wrth raglen Good Evening Wales y BBC nad oedd yn credu fod yr ymddiheuriad yn mynd yn ddigon pell.

"Unwaith rydym wedi cael gwybod yn glir gan Jeremy ei fod yn deall fod y sylwadau yn wrth-Semitaidd, rwy'n credu fod hyn angen mwy nag ymddiheuriad am y niwed y gallai hyn fod wedi ei achosi.

"Mae hyn yn fater o arweinyddiaeth, ei allu i roi terfyn ar y sefyllfa ofnadwy rydym yn canfod ei hunain ynddo.

"Rwy'n teimlo ar hyn o bryd fod yr arweinyddiaeth yn palu twll i'w hunain.

"Mae angen rhoi stop ar hyn ac mae angen eglurder beth ddigwyddodd yn y cyfarfod yn 2010... ac mae agen rhoi terfyn ar yr ymchwiliad mewnol sy'n cael ei gynnal i Ian Austin a Margaret Hodge."

Yn y cyfamser, mae AS Pontypridd Owen Smith, wnaeth herio Mr Corbyn am yr arweinyddiaeth, wedi dweud bod Llafur wedi eu clwyfo gan yr honiadau o wrth-Semitiaeth yn eu herbyn.

Fe wnaeth Mr Smith drydar fod y blaid yn euog o hunan-niweidio.