Cleifion i gael mynediad at gofnodion meddygol drwy ap

Mae system newydd yn cael ei dreialu gan un o fyrddau iechyd Cymru sy'n galluogi cleifion i weld eu cofnod meddygol drwy ap ar y ffôn neu'r cyfrifiadur.

Cafodd Patients Know Best - sy'n ddwyieithog - ei lansio gan Fwrdd Iechyd Prifysgol Abertawe Bro Morgannwg (ABMU) ym mis Gorffennaf.

Mae'r dechnoleg eisoes yn cael ei ddefnyddio mewn 30 ysbyty ar hyd Lloegr, ond ar hyn o bryd yn cael ei dreialu mewn rhai adrannau arbenigol yn unig gan ABMU.

Dywedodd Deborah Isidoro, un o ddefnyddwyr yr ap: "Mae'n rhoi gwell syniad i mi o'r hyn sy'n digwydd - rhoi mwy o bŵer yn fy nwylo i, mewn ffordd."

Be mae'r ap yn ei wneud?

• Storio gwybodaeth am apwyntiadau, canlyniadau a chynlluniau gofal;

• Mae'n gallu cysylltu â dyfeisiau eraill megis y rhai sy'n monitro lefelau siwgr yn y gwaed;

• Lefelau cyfrinachedd a diogelwch uchel er mwyn amddiffyn gwybodaeth sensitif;

• Modd i feddygon siarad gyda chleifion drwy alwadau fideo;

• Cynnig clipiau fideo i helpu cleifion ddeall eu cyflwr yn well, a sut i ofalu amdano.

Mrs Isidoro, gafodd drawiad ar y galon yn 2016, oedd un o'r cleifion allanol cardioleg cyntaf i ddefnyddio'r ap.

Ar ôl derbyn triniaeth, mae hi'n credu y bydd yr ap yn "hanfodol" wrth geisio sicrhau bod ei chalon yn gwella, a'i bod yn osgoi problemau tebyg yn y dyfodol.

"Mae gen i ganlyniadau profion gwaed ers dros 18 mis, ond dwi ar ddeall y bydd mwy yn cael eu hychwanegu ar-lein," meddai.

"Mae'r ap yn hawdd iawn i'w ddefnyddio."

Mae'r ap yn hawdd i'w ddefnyddio yn ôl Deborah Isidoro

Cafodd y system ei defnyddio am y tro cyntaf yng Nghymru yn Ysbyty Treforys, Abertawe ond nawr mae'r bwrdd iechyd yn ehangu'r cynllun ar hyd 10 adran ym Mhen-y-bont.

Yn ôl Louise Ebenezer, nyrs arbenigol yn Ysbyty Tywysoges Cymru, bydd yr ap yn eu "galluogi i gyfathrebu yn fwy effeithiol gyda 500 o gleifion gan leihau pwysau gwaith".

"Ar hyn o bryd 'dan ni'n derbyn 30 i 40 o alwadau y dydd gan wahanol gleifion yn holi pryd i gymryd eu tabledi, neu pryd mae'r apwyntiad nesaf," meddai.

"Gyda'r system yma, gall cleifion yrru neges drwy e-bost a gallwn ni wedyn ateb eu cwestiynau ar amseroedd penodol."

'Defnyddio amser yn well'

Dywedodd yr Athro Hamish Lang, rheolwr prosiect ABMU, eu bod nhw'n gwerthuso'r system ar hyn o bryd, ac yn gobeithio ehangu ar hyd adrannau eraill o fewn y bwrdd iechyd.

"Mae'n ein galluogi i ddefnyddio'n hamser yn well, ac i gael sgyrsiau gwahanol gyda chleifion gan eu bod nhw'n fwy gwybodus."

Ychwanegodd: "Mae o hefyd yn golygu nad oes rhaid gwastraffu amser yn gweld cleifion nad oedd angen cael eu gweld yn y lle cyntaf."