Pennaeth cwmni theatr yn 'agored i drafodaeth'

Roedd llythyr gan 40 o ddramodwyr yn annisgwyl meddai Kully Thiarai

Dywed pennaeth cwmni National Theatre Wales (NTW) ei bod hi'n "agored i drafodaeth" ynglŷn â llwybr datblygiad y cwmni yn y dyfodol.

Dyma'r tro cyntaf i Kully Thiarai drafod sefyllfa'r cwmni ers i 40 o ddramodwyr gwyno bod NTW yn tanseilio artistiaid o Gymru.

Ac fe wnaeth Ms Thiarai, sydd wedi bod yn gyfarwyddwr artistig ers 2016, gydnabod fod rhywbeth wedi mynd o'i le o ran y berthynas rhwng y cwmni a'r dramodwyr.

Ym mis Medi fe wnaeth 40 o awduron lofnodi llythyr yn cwyno am ddiffyg cyfleoedd i ddramodwyr ac artistiaid o Gymru.

Dywedodd Ms Thiarai wrth BBC Cymru fod y llythyr wedi bod yn annisgwyl.

Mae National Theatre Wales wedi bod yn llwyfanu cynhyrchiadau ers 2010

"Mae'n amlwg o'r safbwynt os ydych yn cyfri' eich hunain yn sefydliad agored a'ch bod yn teimlo fod pobl yn gallu siarad â chi - yna roedd o'n siomedig," meddai.

"Ond rwy'n cydnabod fod yna bryderon gwirioneddol a bod yna gwestiynau difrifol roeddynt am eu trafod.

"Maen nhw'n gwestiynau amserol wrth i ni agosáu at ein pen-blwydd yn ddeg oed."

Mae NTW yn derbyn tua £1.5m y flwyddyn oddi wrth Gyngor y Celfyddydau.

Fe fydd rhai o'r awduron wnaeth lofnodi'r llythyr o gŵyn yn cwrdd â rheolwyr NTW, gan gynnwys Ms Thiarai, nos Iau.