Naw ymosodiad ar Heddlu'r Gogledd dros y penwythnos

Mae Heddlu Gogledd Cymru wedi dweud bod ymosodiadau ar eu staff yn "annerbyniol", yn dilyn naw digwyddiad o'r fath dros y penwythnos.

Dywedodd y llu y bu ymosodiadau ar heddweision ym Mangor, Deiniolen, Llandudno, Prestatyn, Y Rhyl a Wrecsam.

Roedd un o'r ymosodiadau yma yn ystod y gêm bêl-droed rhwng Wrecsam a Chasnewydd nos Sadwrn, ac roedd ymosodiad ar heddwas arall yn Wrecsam dros y penwythnos hefyd.

Ymosodwyd ar ddau swyddog ym Mangor nos Wener wrth iddyn nhw arestio rhywun, ac roedd digwyddiad tebyg yn Neiniolen brynhawn Sadwrn.

Roedd ymosodiadau ar heddweision yn Llandudno a Phrestatyn hefyd, ac ymosodiad ar ddau swyddog yn Y Rhyl wrth ddelio â pherson am fod yn feddw.

'Digwyddiadau brawychus'

Dywedodd dirprwy Brif Gwnstabl Heddlu Gogledd Cymru, Neill Anderson: "Rydym wedi mynegi ein gofid nifer o weithiau eleni am barodrwydd rhai unigolion i ymosod ar swyddogion heddlu a SCCH wrth iddynt gyflawni eu dyletswyddau.

"Mae'r digwyddiadau brawychus hyn dros y penwythnos ar draws gogledd Cymru yn hollol annerbyniol.

"Ni ddylai ymosodiad o unrhyw fath gael ei ystyried yn 'rhan o'r job' a rhaid i droseddwyr ddeall na fydd Heddlu Gogledd Cymru yn dioddef ymddygiad o'r fath.

"Yn ffodus nid oedd neb wedi eu hanafu yn ddifrifol ac wrth i dymor yr ŵyl ddechrau bydd y cyhoedd yn gweld swyddogion allan yn ceisio cadw ein cymunedau yn ddiogel."