Datblygu diwydiant pysgod cregyn yng Nghymru

Mae cynhyrchwyr, gwyddonwyr a rheoleiddwyr pysgod cregyn wedi cyfarfod ym Mhrifysgol Bangor er mwyn datblygu Canolfan Pysgod Cregyn newydd.

Bwriad sefydlu cynllun o'r fath yw cynyddu a chynnal sector pysgod cregyn dros Gymru.

Daw hyn wedi buddsoddiad o £2.8m gan yr Undeb Ewropeaidd i'r Ganolfan Wyddoniaeth ym mis Awst.

Dywedodd cyfarwyddwr y prosiect, Yr Athro Lewis Le Vay o Ganolfan y Môr Cymru Prifysgol Bangor, bod y gweithdy'n gyfle i "gydnabod cyfleoedd a chyfyngiadau yng nghyswllt cynhyrchu pysgod cregyn ledled Cymru".

• Cynlluniau i warchod cregyn gleision Conwy

• £2.8m o gyllid yr UE ar gyfer ymchwil ym Mhrifysgol Bangor

'Creu diwydiant cynaliadwy'

"Y gobaith yw cynnal diwydiant pysgod cregyn llewyrchus," meddai'r Athro Lewis Le Vay.

Dywedodd fod y diwydiant ar hyn o bryd yn "ganolog i Fangor gyda dros hanner cynnyrch cregyn gleision Prydain yn dod o'r Fenai".

"Rydym yn gobeithio ehangu'r sector tu hwnt i'r ardal yma ac mae cynrychiolwyr o nifer o ardaloedd dros Gymru yn dod i'r gweithdy," ychwanegodd.

Dywedodd James Wilson, o Gynhyrchwyr Cregyn Gleision Bangor, ei fod yn edrych ymlaen at weld y "potensial yn nyfroedd Cymru i wella a chynyddu cynhyrchiant pysgod cregyn".