Cyhoeddi enw dyn fu farw ar Yr Wyddfa ar noswyl Nadolig

Cafodd y dyn ei ddarganfod yn farw islaw Bwlch y Saethau

Mae dyn a fu farw ar ôl disgyn ar Yr Wyddfa ar noswyl Nadolig wedi ei enwi.

Roedd Graham Schultz yn 41 oed ac o Gaerdydd.

Yn ôl Crwner Gogledd Orllewin Cymru, Dewi Pritchard Jones, mae ymchwiliad i'w farwolaeth wedi dechrau.

Cafodd Tîm Achub Mynydd Llanberis wybod am y digwyddiad ar 24 Rhagfyr gan aelodau o'r cyhoedd oedd yn pryderu bod rhywun wedi cael ei ddal wrth i gerrig syrthio.

Cafodd hofrennydd Gwylwyr y Glannau ei anfon i'r ardal, ond roedd y dyn eisoes wedi marw.